呃Like 呃出人鬼戀(完): 第二十四晚：老麥必瘦站之迷！雌雄對決？

「你嘅留言信箱有一個新嘅口訊，要收聽請按1 字。」老麥一大早已經坐喺麥記，享用緊佢嘅珍寶早餐，順手拎個電話一睇，先知有一個未接電話同一個留言。

「咩話？個死仔終於都帶條女出嚟。睇嚟都成事喎。」老麥一邊聽，一邊將沾滿哂蜜糖嘅熱香餅放入口。

雖然老麥將重點放咗喺「同嗰女仔入粉嶺」之上，不過聽語氣，都感覺到阿澤真喺有急事，所以老麥將個薯餅打包拎走，諗住見面果陣再慢慢食。

嚟到粉嶺站外，老麥先撥個輪俾阿澤，但喺響咗兩下就掛咗線，一次喺咁，再打又喺咁。

「死仔唔喺又玩嘢呀！啱啱先嬲完佢咋喎。」老麥心諗。





點知，就喺同時間，見到阿澤同個女仔撓哂手臂咁出咗閘。

本來老麥想走上前去叫佢，但喺見到阿澤好似心不在焉，完全唔似喺情侶拍拖嘅感覺，就決定尾隨跟踪。

反正跟踪，又無咩做，而且又開始肚餓，所以老麥拎番個薯餅出嚟慢慢食。

跟咗阿澤同個女仔一陣，兩個人突然間停咗喺路邊，原來喺拎部手機出嚟玩自拍，明明只喺好普通情侶會做嘅事，不過老麥就睇得出阿澤想拒絕，最後個女仔仲主動鍚咗佢一啖，阿澤嚇到呆咗咁。

「嘩！依家啲女仔又會咁主動？嚇嚫我地嘅澤哥喎。」朋友遇「襲」，仲點可以就手旁觀，梗喺要參與埋一份。





＊＊＊＊＊＊＊＊＊＊＊＊＊＊
「老麥？你嚟咗就好啦。」我見到老麥出現，尤如見到嗰大靠山，不自覺咁走埋佢身旁。

「仲好講，又約我嚟粉嶺，打極電話俾你又唔聽。」老麥將最後一啖薯餅都吞埋。

「電話？」我望向小宜，見佢將手機故意收埋入褲袋，我就估到咩事。

「喺呀！喺我特登唔接，今日明明喺我地兩個出嚟，點解依個人會出現架。」小宜指住老麥，怒目而視。

「喂？你地要耍花槍，唔好搵我嚟搞。我對3P一啲興趣都無。」老麥誇張地攤開雙手，擺明挑釁。





「阿澤......點解呀......」小宜用一種好迷網眼神望住我。

「我喺諗住多個人幫手去搵你家姐架。小宜......你做咩？」我唔敢行埋小宜身邊，佢變得好古怪。

「啊......阿澤，你有咗我就唔需要再理家姐，你唔需要有朋友，唔需要有家人，你只要有我就夠，你過嚟我到，你返番嚟呀......啊......我個頭好痛呀......」小宜好痛苦咁雙手抱頭，一時仲大力咁敲個頭。

連老麥都俾小宜嘅異常嚇嚫，同我一齊慢慢退後。

「喂，宅哥？好食唔食，食件痴女？好難哽喎！」老麥苦笑。

「唔喺架，小宜唔喺咁架，佢......佢似撞邪呀。總之一言難盡，我約你出嚟本來想解釋你知，不過睇嚟又唔啱時侯。」我認真咁答。

「咁點呀？不如走啦，返去市中心搵間麥記坐低再傾囉。」老麥講得輕鬆，不過眼睛一直無離開過仲喺到掙扎嘅小宜。





雖然我地兩個講得好細聲，不過仲喺俾小宜聽到。

「要走你一個人走，阿澤喺我嘅，佢喺屬於我嘅。」小宜表情仍然好痛苦，不過己經企咗起身，一步步咁走行緊埋嚟。

「咪鬼理佢啦，日光日白學人撞邪，都算經典。」當老麥伸手過嚟搭住我肩頭嘅時侯，從後就衝嚟一股好強勁殺氣。

依股氣我當然非常熟悉，就喺果晚，一個外表柔弱嘅女仔，突然喺我眼前消失，之後就喺一個勁度十足嘅......

小宜一手扣住咗老麥搭喺我肩頭隻手，然後腰馬一沉；老麥亦被依吓拉力搞到成個人向後傾倒，完全失去重心......

之後就喺一個勁度十足嘅......過肩摔！

我竟然喺依個咁重要嘅關頭，好似女仔咁合埋咗雙眼唔敢睇。

當一下清脆俐落倒伏聲響起，我先至逐少咁睜番開隻眼。





「老麥我對你唔住......」心諗。

不過，可能我琴晚真喺瞓得唔好，所以眼前嘅景像非常之超現實。

小宜隻手仍然扣住老麥唔放，但喺倒地嘅竟然喺小宜？

我定哂格咁望住老麥。

「喂，宅哥？你仲有幾多嘢要同我解釋架？你識條痴女，又要撞邪？又要發癲？仲要咁好打嘅？」老麥面不紅，氣不喘，只喺對住我苦笑。

「你做過咩嚟？」我急問。

「吓？你條女要撻我呀？我咪撻番佢囉。」老麥明顯唔明我問題重點。





「我喺問你點解可以撻到佢呀！」我再大聲咁問。

「喂！我話哂都學咗四年泰拳，咁嘅偷襲都反擊唔到，俾我師父知道殺咗我架。」老麥覺得我嘅問題，好有問題。

「四年？點解我唔知架？」

「喂！我學果陣時有問你架，喺你自己話痴Q線，無事搵事做，留喺屋企打機仲好咋！」

依家我醒起啦，四年前！就喺四年前我先幫佢起咗「老麥」依個名。

老麥就喺因為醉心於學拳，所以先至要日日去食垃圾食品，不斷補充對正常嚟講超哂標嘅熱量，脂肪同膽固醇。