呃Like 呃出人鬼戀(完): 第二十三晚：侵犯要叫唔好架！救星參上？

瞓梳化真喺好唔舒服，所以一早我就起咗身。

原來，小宜佢仲早，已經入咗洗手間梳洗。而我就見房無人，走咗入去想拎番部手機同小雅講聲早晨，點知，小宜原來拎埋部手機入去。

「哈，兩姐妹真喺糖黐豆咁好嘅。可惜我喺獨仔，感受唔到。」我不以為意。

琴晚，我地商量過，由小宜帶路，點都要去一趟東北，試下靠近收埋小雅嘅道堂。當然，只喺得我地兩個人會比較危險，所以，我決定將老麥都拉埋落水。

我用屋企嘅電話打俾老麥，不過飛咗去留言信箱。





「老麥，急CALL。其實之前已經好想搵機會同你講件事，不過依兩日唔止忙咁簡單囉。總之，我今日會同嗰女仔入粉嶺果邊，你收到訊息就覆我。趕急嘢嚟架。」我對住聽筒留低最重要嘅說話。

件事實在一匹布咁長，都喺見面再講啦。

啱啱收線，就聽到洗手間開門。

我一時唔敢相信自己隻眼！做咩突然俾啲咁嘅福利我？

小宜正拎住條毛巾喺到抺緊仲有少少滴水嘅頭髮，由於沖過熱水涼，面頰仲紅卜卜，而令最我地依啲宅男支持唔住嘅，佢竟然拎咗我掛喺衣櫃果件恤衫嚟著，再加埋一條緊身嘅排球波褲。





如果喺漫畫，相信我己經噴咗兩行鼻血，不過正常男仔，依家只喺充血啫。

「早......早晨呀，小宜。」我夾緊雙腳坐得好端正。

「嘻，阿澤做咩呀你，快啲去沖涼換衫啦。我地要趁早出發啦。」小宜用一雙玲瓏嘅大眼睛望實我，然後笑笑口咁話。

當小宜行過我身邊，我仲聞到少女加上洗頭水嘅獨特香味。

等等，唔好亂諗嘢，今日唔知會發生咩事，要保持體力......唔喺唔喺，要保持意志力！





我彎低身衝入洗手間，較大個花洒沖番個凍水涼先，冷靜。

我地由油塘出發，搭港鐵去到九龍塘站，再轉東鐵入粉嶺。不過全程車我都覺得好唔自在，當我望一望靠喺我身邊嘅小宜，我就知道啦。

喂！當然唔喺我仲諗緊啲衰嘢！

而喺手機呀。

我先發覺，由琴晚到依家，小宜拎到部手機之後就從未離身，可能佢覺得俾阿克搶走咗小雅感到內疚啦，而我又唔好意思問佢攞番，所以只好不停咁偷望佢。

「阿澤你做咩喺咁偷望我啫？」小宜將手機㩒住衫領，面紅紅咁抬頭。

「哦？哈哈，唔好意思囉。」我急急咁拎轉塊面。死啦越搞越誤會添。

突然，手臂俾人撓住，我都仲未嚟得切反應，就有一種好柔軟嘅觸感穿透過嚟。





「要落車啦，阿澤你咪傻傻地咁啦。嘻嘻。」小宜將我手臂抱得更加緊，然後拉咗我出車箱。

喺囉？我做咩傻吓傻吓咁。

離開咗車箱，出埋閘口。

我嗰心仍然跳得好快，咁大嗰仔都未試過同女仔行得咁近，而小宜就一直撓住我向直行，無放開嘅意思。

我就迷迷糊糊咁繼續由小宜帶住我走，不過好似有件好重要嘅事唔記得咗嘅？

小宜好純熟咁穿過幾條大街之後，慢慢人跡減少，到咗一處鄉郊。原來香港都保留咗咁古色古香嘅地方，可惜仲可以留得幾耐丫......

「阿澤不如我地影張自拍？」小宜已經將手機切換到自拍模式。





「但喺好以唔啱時侯喎，話哂都喺敵人嘅地頭。」做咩咁突然要自拍？小宜變得有啲怪，同我第一次喺後巷見果嗰小宜好唔同。

雖然話女仔有好多面，但無理由佢唔知今次嚟，唔喺遊山玩水架。

我本來想拒絕，但喺小宜好大力咁將我手臂拉得更埋。

「阿澤你要貼埋啲先得，如果唔喺點影到我地兩個架。」小宜嘅笑容雖然好燦爛，但喺唔知點解，我有種好詭異感覺。

就喺我決定勉為其難就吓小宜影咗佢嘅時侯，小宜竟然蹬起雙腳鍚咗我塊面一啖，然後手機快門就「咔嚓」影咗落嚟。

我一時呆咗唔知點做，而小宜就露出一個滿意嘅笑容，就好似軍人打勝仗果一種。

「喂喂喂，阿澤？你無聽寶寶龍講？喺唔鐘意嘅時侯記得叫唔好，仲要話俾你信得過嘅人知呀。」石路嘅盡頭走出一個身型高挑瘦削嘅男仔，一手插住褲袋，一口咬住薯餅。

老麥！





我終於記番起，有咩重要嘅事啦。