《星空之願》(前稱:3A班死亡遊戲): 十九、

曉峰推門而出，衝向其他宿舍，計時器滴答作響。

僅剩30秒時，他推門返回一號房，喘著氣說：「我已經盡力，講咗樂希嘅平票提議，結果就睇大家信唔信，同埋有冇搏啱。」

他坐回阿偉的左邊下格床邊，四人緊靠在一起，阿偉張開雙腿而坐，樂希依舊坐在他兩腿中間，阿偉攬住他，永誠與曉峰靠在兩旁。四人緊握彼此，無人言語，靜待命運的降臨。

計時器「滴」一聲歸零，不久後機械人推門而入，紅眼閃爍，無聲地收走四人的紙張。

眾人不敢出聲，不敢面對將到來的命運，只得閉上雙眼，樂希緊握阿偉的手臂，低聲嗚咽，阿偉攬緊他，永誠與曉峰握緊拳頭，屏住呼吸。宿舍內死寂一片。





片刻過後，廣播機械聲響起：「遊戲結束。二號房馬俊奇得票最高、處決。其餘房間沒法達至一人最高票結果。孤獨者已處決」

四人聽到後隨即睜開雙眼。樂希喊道：「冇事啦！」阿偉攬緊他，低聲說：「我哋無事！」永誠笑出聲來，抓住曉峰的肩膀說：「搏啱咗！」曉峰抹了抹眼角，笑了笑。

四人激動相擁，淚水與笑聲交織，終於鬆了一口氣。曉峰低聲說：「我盡咗力，但最後都說服唔到心然，好可惜。」阿偉抓住他的手臂，低聲說：「你已經做得好好，起碼救多咗兩個人。」永誠點頭說：「係心然嘅問題，唔係你，佢咁自私一定唔肯博。」

樂希握緊曉峰的手，細聲說：「曉峰，多謝你。」曉峰回應：「應該多謝你先啱，冇你嘅提議根本唔會全員生還。」

阿偉即刻說：「係囉，我樂希真係好叻！」他一邊說一邊湊過去想親樂希，樂希害羞地推開他，低聲說：「喂，唔好咁啦咁多人！」





永誠見狀加入，笑說：「我都覺得樂希好叻！」作勢要湊過去親樂希。平時冷靜的曉峰也忍不住笑說：「咁樂希都算救咗我，我應該都要錫！」

樂希尷尬得臉紅，喊道：「喂，我唔係個個都錫得架！」阿偉笑著說：「係囉，得我錫得！」他直接壓住樂希，在他嘴上親了一口，樂希推不開他，喊了一聲：「喂！」場面滑稽，四人笑成一團。

廣播機械聲響起：「請參與者完成早前給予的飯盒，提示：下午的活動高度體力化。」