《星空之願》(前稱:3A班死亡遊戲): 十八、

視角回到一號房。樂希、阿偉、永誠和曉峰四人擠在阿偉的左邊下格床上。大家都在低頭沉思，氣氛死寂。

阿偉張開雙腿坐在床尾，樂希直接坐在他兩腿中間，整個人緊貼著阿偉，阿偉雙手攬住他，沉默中透出幾分依賴。
永誠坐在床中央，握住筆低頭不語。
曉峰則站在床頭，望著計時器滴答作響。

片刻過後，曉峰果斷地拿起紙筆，在他的紙上寫下「陳曉峰」，動作乾脆利落。

其他三人一驚，抬頭望向他，阿偉低聲說：「曉峰，你做咩？」樂希細聲說：「曉峰？」永誠握緊拳頭，低聲說：「點解？」





曉峰望著他們，歎了一口氣，低聲說：「我分析過，你哋三個係好朋友，樂希同阿偉仲要係情侶，我點計都係最多票。」

樂希一震，臉紅了起來，尷尬問道：「吓，邊個同你講㗎⋯⋯」永誠連忙澄清：「嗱我真係冇講過。」

曉峰無奈地笑了笑：「我諗唔使人講都會知。你哋成日坐到痴埋一舊啦，晚晚又一齊訓，今朝一起身仲聞到陣怪味……你哋琴晚」他停頓了一下，眼神帶點揶揄。

阿偉與樂希想起昨晚他們忍不住親熱，頓時尷尬，阿偉攬緊樂希，低聲打斷：「係喇！我哋係情侶，你唔好再講啦！」樂希縮在他懷中，細聲對阿偉說：「都叫咗你唔好……」永誠在一旁偷笑，低聲說：「吓，你哋琴晚原來……」

曉峰揚手阻止永誠繼續說：「算啦呢啲唔係重點，唔緊要啦。講返正題，總之我知你哋三個關係好好，我只係一個外人，點都應該係我死。」





樂希從阿偉懷中坐直，認真地說：「曉峰，但係……」

曉峰即刻打斷他，低聲說：「得架啦樂希，我明你一定會話唔好。我想講呢幾日我認識咗你哋好開心，你哋係一班待人接物都好真誠、值得深交嘅朋友。如果有來生，希望可以早啲識到你哋。」他笑了笑，眼角帶著一絲濕潤，但語氣堅定。

此時，計時器尚餘13分鐘。樂希突然提出一事，低聲說：「等等先曉峰，其實我一直覺得個規則有個漏洞，但唔肯定，唔知大家願唔願意同我一齊博一次。」

三人望向他，阿偉低聲說：「咩漏洞？」樂希緊握阿偉的手臂，細聲說：「你哋唔覺得今次個規則講法好奇怪咩，佢好刻意咁講話只會進行一輪，每間房只會有一個人死。」

他停頓了幾秒，繼續說：「咁就算呢一輪4個人平票，根據規矩，都唔會有多過一個人死，又唔會有新一輪，咁理論上遊戲已經完咗，係咪即係唔會有人出事呢？」





阿偉聽完，點頭說：「你好似講得幾有道理，如果跟規則，就算平票，都唔會死過一個人，我哋可能真係無事。」永誠閉目沉思，未即刻出聲。

曉峰想了一會說，搖著頭說：「我明你意思，但咁樣有啲冒險，就算佢真係只死一個，我驚佢會變做隨機死一個。」

「係有咁嘅可能性，但大家願唔願意搏一搏，希望全員生還？」樂希堅定地說。

阿偉第一個贊同，低聲說：「樂希我撐你！」他即刻在紙上寫下「陳正偉」。

樂希見全房皆知他們的情侶關係，笑了笑，在阿偉臉上親了一口，低聲說：「多謝你願意信我。」隨後在紙上寫下「張樂希」。

永誠思索片刻，也寫下「劉永誠」，笑說：「好啦，我跟你哋，搏一搏，單車變摩托。」

「師兄呀你咩年代？咁old school 嘅gag 講出嚟勁Kam。」阿偉笑說。

「大癲！我冇辦法相信。」樂希也加入取笑。





在三人歡樂地打鬧時，平時冷靜的曉峰忍不住流淚，他低聲問樂希：「其實就算諗到，點解要講出嚟？明明你哋一定唔使死，而家為咗我要冒呢個風險？」

樂希收起笑容，一臉認真地回應他：「曉峰你咁樣我可能會嬲㗎。經過呢幾日嘅相處，你都係我哋重要嘅朋友呀，我哋都唔想你死，你啱啱仲講咩自己係外人。」
阿偉與永誠馬上附和，阿偉說：「係囉，你你而家冇得置生事外啦！」永誠抓住曉峰的手臂，將他拉近，四人相擁。

曉峰低聲說：「多謝你哋……」永誠舉起曉峰一開始寫了自己名字的紙，笑說：「嗱，你都寫咗自己名啦，啫係同意。」曉峰抹了抹淚，笑出聲來。

計時器滴答作響，顯示僅剩7分鐘。

曉峰此時站起身，低聲說：「呀，樂希啱啱講起規則，我都諗起啲嘢。規則話唔可以離開宿舍樓，唔係宿舍房間，所以如果我去其他人嘅房，其實都冇犯規，因為我冇離開宿舍樓。」

樂希意會，問道：「曉峰，唔通你想……」

曉峰點頭說：「冇錯，我想去提其他房樂希嘅提議。佢哋接唔接受，就睇佢哋決定啦。時間無多，我出去一出去好快返嚟。」





永誠低聲說：「有三間房喎，不如一人去一間。」

曉峰拒絕，低聲說：「俾我做返啲嘢啦。」