《星空之願》(前稱:3A班死亡遊戲): 二十、

一號房四人在房內完成午膳後，時間已近兩時半。

廣播機械聲響起，聲音在每間宿舍內同時傳出：「下午三時前，請一號房與二號房於到達教學樓五樓音樂室集合、四號房與六號房前往教學樓一樓家政室集合，準備進行下一遊戲。」

兩點半，樂希、阿偉、永誠、曉峰、心然、家明和黑仔齊集於教學樓五樓的音樂室。

房內光線昏暗，樂器和樂譜等散亂一地。桌上放著七件背心。每件背心背後皆用魔術貼貼著一塊名牌，四件背心後的名牌上寫著英文字母「A」。

兩間房早有嫌隙，各自抱團坐開，沒有對話，氣氛緊張。





廣播機械聲響起：「遊戲五、分組對抗賽。根據電腦抽籤，一號房與二號房七人為A組，四號房與六號房八人為B組。遊戲限時一小時，一小時倒數結束時，兩組中剩餘人數較少之一組落敗，落敗組將抽籤，處決隨機一間房的所有參與者。」

聽到要合作，永誠和曉峰瞪了心然一眼，心然也不甘示弱回瞪，本想說些甚麼，又被廣播打斷。

「遊戲中可使用適當暴力搶奪名牌，但任何致死或致殘之攻擊視為違規，違規者即刻處決。被搶走名牌的參與者立即淘汰，廣播會提示其立即停止行動，並立即返回自身房間等待遊戲結束，不得再離開房間，直至另行通知，否則視作違規，違規者處決。」

音樂室內眾人皆仔細地聆聽規則，氣氛凝重。

「遊戲範圍僅限教學樓一樓至五樓，離開範圍者視作違規。遊戲將於十五分鐘後正式開始，請留意廣播通知，遊戲開始前離開現時房間同樣視作違規。請注意，本遊戲不設和局，若限時結束時兩組人數一樣，將隨機抽一組，整組處決。」





音樂室內的七人沉默，音樂室前方白板上掛著的計時器顯示「15:00」，開始倒數。

阿偉低聲跟組員說：「咁我哋咪要同心然一組？」

永誠瞪著心然說：「坦白講我冇信心同佢哋合作。」

曉峰低聲說：「規則話可以用適當暴力，只係唔俾致死同致殘攻擊，換言之會有人受傷。」

樂希關注的地方不同：「打和要抽一組兩間房死，輸咗都只係一間房死，打和仲罰得重過分輸贏……」





「嗯，啫係我哋唔可以同佢哋夾和局。」曉峰推了推眼鏡。

心然沒有讓一號房四人繼續私下討論，他從遠處喊到：「呢個遊戲我哋已經劣勢，只有7個人，對面有8個。如果你哋唔積極遊戲，有一半機會死，你哋自己諗。」

見一號房四人沉默，心然繼續說：「再加上如果我哋認真玩，永誠、阿偉，你哋運動能力本身就強。我呢邊家明同黑仔都打得，再加埋樂希、曉峰同我嘅智慧，基本上唔會輸。」

「我諗你哋要啲時間消化，你哋自己諗啦。總之，我哋三個會努力玩。」心然沒給一號房思考的時間，又繼續說。

曉峰語帶不滿地說：「如果上一場遊戲你肯聽勸用平票，宜家就會兩邊都8個人，我哋就唔會好似你咁講一開始就處於下風啦。」

心然冷靜回應：「係啊，但已經過咗去啦，你應該知道再討論前事已經冇用。而家事實我哋就係少一個人，就係劣勢。」

「定係樂希你咁叻上round諗到個方法安全渡過，你今次又諗到咩絕世好橋啊？如果冇，不如我哋傾下點搶佢哋啲名牌仲好啦。」心然繼續咄咄逼人。

阿偉見樂希被提及，不滿地叫到：「你咁嘅態度似係想合作咩？」





「使唔使我大佬跪低求你呀！？」黑仔踏前一步喊到。

心然阻止黑仔，然後帶著黑仔與家明走向音樂室後方，他不忘多補一句：「算啦我諗我哋好難一齊行動，你哋自己努力啦。雖然曉峰你哋應該諗到，但提多句，佢哋知道自己有優勢，一定會避戰，唔想死就要積極進攻。」

說罷心然就拉走黑仔和家明到後方討論戰術。樂希低著頭，無言以對，阿偉狠狠瞪著心然的背影。

一號房四人走到另一邊討論，曉峰低聲說：「心然雖然乞人憎，但佢今次佢分析得冇錯。今次比賽我哋的確處於劣勢，可能都要真係同四號房六號房鬥。如果唔係，一半嘅死亡率太高喇。」樂希灰心地說：「今次嘅規矩好似真係冇漏洞……」