森の浪人去旅行 #6 #7: 森の浪人去旅行 #6
森の浪人去旅行 #6
前言：呢個係加長版，免費放送。
投票：我最喜愛嘅角色（請使用你專屬嘅gmail。）
https://www.patreon.com/posts/tou-piao-wo-zui-122819100?utm_medium=clipboard_copy&utm_source=copyLink&utm_campaign=postshare_creator&utm_content=join_link
正文：
Tania望住我：係你？你又喺度嘅？
Chiara同Greta就奇怪點解Tania會識我。
Tania：哦！轉頭先講，點咗嘢先！
Tania望住甜品menu，又開心又苦惱：今日咁好嚟呢度，食咩好呢？全部我都想食喎。
Chiara突然對Tania講：你小心啲揀啊。
我就突然醒起Tania手上嘅紅點，我有種感覺，Tania係嗰種明知自己對食物敏感，但係都忍唔到口嘅女仔。既然佢有好多款甜品都想食，真係想提佢揀走自己敏感嗰啲。
不過，當面話人食物敏感，實在太無禮貌。有無方法可以提到佢，但又唔會太直接呢？
我諗到一個方法，可以試下。
我扮對甜品一樣好有興趣，於是同Tania一齊打開甜品menu嚟睇。
果然不出我所料，menu有列出一般可能有嘅食物敏感類別，我就借勢話：我真係好欣賞呢啲咁細心嘅餐廳。
三位意大利女士就聽我繼續講。
我：餐廳會提醒有食物敏感嘅客人喎。
我自以為自己好醒咁借讚餐廳嚟提Tania，點知Tania即刻大叫：唓！做咩提人㗎！
Chiara同Greta就即刻大笑。
睇嚟我呢個以為好隱晦嘅方法都仲係太過明顯喇。
不過，我諗我真係估中咗，Tania係特登唔理自己食物敏感嘅女仔。
我見Tania發嬲，即刻想補鑊：咁都有好多款嘅。
Tania就話：無嘢喇，而家唔洗揀喇，得返一款咋！
Chiara同Greta極力忍笑。
我當然笑唔出，情況好似係我破壞咗Tania嘅好事咁，我必需要補鑊！
我再望咗下個menu：唔係喎，呢度話可以同佢哋廚師講，佢哋可以調整食物嘅材料㗎！
三位女士聽到我咁講，都一齊望清楚個menu。
於是，Tania終於平伏落嚟，向侍應落單。
Chiara同Greta仍然好奇點解Tania會識我，Tania就講返今日下晝嘅事，同樣話我救咗佢。
Chiara同Greta就突然驚訝，同聲：佢又救咗你？
Tania即刻好奇怪咁急住補充，好似要同佢哋兩個交代咁：一次咋，一次咋。
我又再一次覺得好奇怪，點解要強調次數呢？
但因為啱啱叫甜品嘅事，Greta就再問Tania：咁啱啱，佢算唔算係第二次救咗你啊？
Tania 聽到Greta咁講，突然嚇咗一嚇。
Chiara：Tania，你真係要注意下喇，小心啲設計師介意啊。
我聽到Chiara咁講先了解到，Model 嘅外表可能會影響佢哋有幾多job，咁我提醒Tania睇嚟都真係啲價值。
可惜Tania嘅回應係，化妝師會幫佢攪掂，Chiara同Greta都無佢辦法。
之後，大家又將話題轉移返到我嘅行程之上。
我：我諗住聽日去Uffizi，後日就會去米蘭。
Chiara：哦？我同Greta聽日就會去米蘭喎。
聽到Chiara咁講，我就有啲失望，仲以為已經算朋友，可能仲有其他下文，但偏偏大家前後腳去米蘭，如果唔係，應該可以一齊搭多程火車。我即時諗，我有無可能改行程，同Chiara一齊去米蘭呢？問題係，我今次嚟佛羅倫斯專程要去嘅Uffizi都仲未去，唔係要我咁樣忍痛唔去Uffizi啊嘛？
Greta又問Tania：你呢？
Tania：我會喺度留多兩日，之後會去羅馬。
Greta：噫？咁Tania 可以同Mori一齊去Uffizi喎。
Tania就即刻反駁：儍㗎咩，一睇就知Mori係鍾意自己去Uffizi嘅人啦，我先唔會攪住佢。
Tania其實講得啱，我真係想自己一個行Uffizi。
不過，Tania又問我：你有無興趣去睇而家佛羅倫斯嘅藝術家展覽啊？
Tania講嘅應該係當代藝術展。
Tania再補充：我識得幾個喺度嘅藝術家，佢哋攪緊個展覽，係專業嘅當代藝術展，絕對唔係一般旅遊景點。
Tania咁講，我當然有興趣，加上，咁嘅話就好似我同重Tania有個私人約會一樣，所以就同Tania交換咗contact。約好咗聽日，我喺朝早參觀完Uffizi之後，佢就帶我去參觀嗰個當代藝術展。咁樣睇嚟聽日節目唔錯，相當期待。
第二日朝早，我喺Uffizi享受咗一個人嘅時光。
望下手錶，Chiara同Greta應該都出發咗去米蘭，我又慨嘆以為會同Chiara有下文，但睇嚟都係算數。就算之後我去到米蘭，都好似無咩理由再搵佢出嚟見面。
好彩仲有Tania，行完Uffizi，我就WhatsApp Tania。
Tania原來已經喺附近，我喺Uffizi等咗一陣，佢就踩住電單車出現。
後記：
投票：我最喜愛嘅角色（請使用你專屬嘅gmail。）
https://www.patreon.com/posts/tou-piao-wo-zui-122819100?utm_medium=clipboard_copy&utm_source=copyLink&utm_campaign=postshare_creator&utm_content=join_link
浪漫版 完整故事
https://firstfantasyromance.blogspot.com/
Patreon 成為免費會員，更多好嘢玩:
https://patreon.com/firstfantasy_mori?utm_medium=unknown&utm_source=join_link&utm_campaign=creatorshare_creator&utm_content=copyLink
instagram 福利:
https://www.instagram.com/morironin/?next=%2F