轉新工唔小心勾引咗個同事: 十五、疏遠

講座嘅前一晚，我又喺公司做到十點。雖然話做公關有開工冇收工係常態，但我發現呢度嘅OT好多時係可以避免，只係因為老細嘅急單、阿姐嘅短視、同事嘅甩漏而搞到我哋收唔到工，加上呢度OT係冇任何補水補鐘，我開始反思究竟我應唔應該繼續留喺度。

上次我哋三個人嘅小爭執之後，大家嘅關係開始愈來愈疏離。Chris對Matt嘅反感有增無減，Matt認定我同Chris係盟友所以有戒心，我亦漸漸領教到Matt嘅零責任心。以今晚為例，話就話係大家一齊留低，到我走嗰刻我都唔見Matt喺office。

正當我同Chris道別，喺樓下等緊老公嚟車我嘅時候，我見到Matt向我嘅方向行緊過嚟。
「走晒喇？」佢拎住枝可樂問我。
「走晒啦。」我想盡快打發佢走，廢事老公見到我哋有咩親密互動。
「你等緊人？」佢開始愈行愈近。
「係啊……」快啲走啦問咁多，平時做嘢又唔見你咁細心。
「聽晚完咗活動你……」佢想捉住我隻手，咁啱我就見到老公架車。


「有咩WhatsApp我啦，拜拜。」我即刻邊行邊同佢揮手，坐上車走人。

「做咩呢排又OT得咁密？」老公今日放假，佢知我夜走所以主動車我。
「聽日有講座，老細同事都戇鳩鳩咁，好多嘢都未搞掂。」我繼續睇電話check email、覆WhatsApp。
「頭先嗰個你同事？」我心頭一震，唔知佢頭先睇到幾多。
「係啊，佢咪係成日做錯嘢嗰個。」
「哦……我聽晚嚟接你？」好彩我頭先冇應承Matt。
「你唔駛返工咩？」
「我拎咗半日唞下，可以同你食飯。」佢伸手過嚟拖住我。
「哦……好啊，我走得打俾你。」我微笑，同時感覺到電話震咗一震，大概估到係邊個搵我，但我決定唔理。



今次嘅講座係同另一個公營機構合作，我哋需要借用人哋辦公大樓嘅演講廳，所以食完午飯我哋就要搬箱set場。
「Summer，你有冇見過Matt？」Chris同Mandy走過嚟問我。
「冇啊，我貼緊櫈背label，冇留意。」
「你幫我搵佢，一陣present啲嘢都未set up好，個人又唔知走咗去邊。」Mandy吩咐到，我唯有放低手上嘅嘢去搵佢，打俾佢又冇人聽，明知一陣就event仲喺度玩失蹤。

我搵勻成層都唔見Matt嘅身影，唯有搭𨋢落去睇下佢死咗去邊，點知就俾我見到佢喺正門同一個女人有講有笑，個女人仲打佢手臂打情罵俏。
「Sorry，要打斷你哋一下。Matt，阿姐搵你。」講完呢句說話我就轉身離開。呢刻我真係好嬲，唔係呷醋嗰隻嬲，係以同事角度嬲呢個人愈來愈離譜。
「我同佢識咗好耐。」Matt喺搭𨋢期間嘗試同我解釋。我開始厭惡嗰種同事、情人身份重疊嘅呢種關係，我唔係呷醋啊，我係嬲你增加緊我工作量啊屌你。
「今晚食飯好冇？」佢見我冇回應，開始得寸進尺，愈行愈緊。


「做嘢先啦好嘛？」𨋢門一打開，我就行咗出去將佢交俾阿姐，直至活動完結我都冇同佢有任何交流。

黃昏六點半，我哋將所有物資運返晒公司，今日嘅工作順利完成。我打電話俾老公，原來佢已經喺附近好快就到，於是我落定樓等。
「你好似有啲嘢冇答我？」頂！點解Matt又喺呢啲時間出現？！
「我約咗人，唔得閒。」經過上次嘅教訓，我決定要同佢保持距離，同時不斷張望老公架車會唔會就喺附近。
「你仲嬲緊？」佢仲以為我係呷醋，我懶得再同佢解釋。
「冇啊，你WhatsApp我啦，我老公嚟緊啊。」以防佢愈行愈近，我唯有講清楚叫佢冷靜啲，咁啱老公架車就泊咗喺路邊行緊過嚟。
「老婆你行得未？」佢望咗望我同Matt，以為我哋講緊公事。
「撞到同事咋嘛，行啦。拜拜Matt。」我趕唔切理Matt嘅反應係點，就拖住老公走咗，我內心唔知核爆咗幾多次。

喺餐廳入面，我同老公點完菜之後，大家都諗唔到講咩好。我個心仲未驚完，不斷諗起頭先嗰個尷尬場面。
「嗰個同事同你好熟？」老公終於都開聲問。
「我哋同team，好多嘢會合作。」噗噗……噗噗……我開始聽到自己心跳聲。
「佢……好似唔係當你同事咁簡單？」唉屌……呢一刻終於都嚟……快啲諗下點答啦你係公關嚟架！！！



「佢追緊我。」