轉新工唔小心勾引咗個同事: 十四、暗湧

我哋兩個都冇乜點瞓，錫下攬下恰咗陣就到天光。噚晚我有同老公報平安，佢話返完通宵再車我返屋企，所以我都唔敢留得太晏，朝早六點幾就起身著衫。
「送你落去？」仲瞓喺床嘅Matt望住我。
「唔駛喇，你唞陣啦。」睇住佢好似小朋友咁向我張開雙手撒嬌，我忍唔住同佢吻別再離開。

我同老公先食早餐，再一齊返屋企，期間大家都冇乜異樣，我亦都唔敢懷疑究竟我有冇露出馬腳。
「噚晚收留你個朋友係邊個嚟？」老公揸緊車嘅時候突然咁問。
「舊同事嚟，佢話佢屋企人ok咪俾我瞓一晚。」講大話要講得自然，一來神情語氣要夠平靜，二來係真假摻雜，七分假三分真，自己講出口嘅時候都逼真啲。我的確係有個舊同事住上水，只不過我唔係去佢屋企咁解。
「哦……咁你應該冇乜點瞓啦。」佢果然好了解我，知道我喺陌生床會瞓唔著。
「係啊，返去實瞓足全日。」我合上眼裝作想休息，其實我都係想佢暫停對話，以免露出更多破綻。



可能有好多人都唔信，我老公有咩可能唔察覺出任何端倪？個老婆冇返屋企成晚，居然可以咁放心？我當然都有呢個質疑，最後歸納出兩個可能性：一、我講大話講得好自然，細節位毫無可疑；二、佢真係非常信任我，我所講嘅每個字每一句佢都唔需要多加思考，就信納係事實嘅真相。呢種信任可貴但脆弱，只要稍微出現裂痕就會崩塌，亦好難再次重建，所以我更加要謹慎，唔可以俾佢知道我利用咗佢嘅信任，作為武器傷害返佢。

但自從呢次之後，雖然我同老公相處上表面如常，一去到我話約咗人去街，佢都似會有戒心咁問好多細節，會問同邊個去、去邊度、幾點走。我唔知佢係咪暗暗喺心入面為我嘅對答表現評分，鑑定我有冇講大話，或者記住我講過嘅說話，睇下我會唔會前言不對後語。

至於Matt，我哋嘅關係冇太大轉變，不過就因為佢開始要夜晚要進修而少咗收工見面，就連朝早搭車都係變返自己一個。咁樣都未嘗唔係一件好事，起碼我可以喺呢一排守規矩，減少老公嘅疑心。

一個如常嘅工作天，我哋籌備緊下星期嘅活動，係一個有大約200人參加嘅講座。
「喂Summer，呢份嘢係咪你寫架？」而家已經接近五點，Chris同我喺Mandy間房行出嚟，就即刻進入作戰狀態。Matt因為要進修所以提早離開咗公司。
「呢份邀請信嚟架喎，Matt寫架嘛。」我拎咗嚟睇一睇。
「妖條友點做嘢架……阿姐早兩日咪改咗個內容囉，搞到我差啲send錯！」Chris一邊埋頭改文一邊抱怨。


「唔好講你……佢嗰part PowerPoint都未update就走咗，阿姐仲話要拎嚟睇……」雖然我同Matt關係非比尋常，但客觀地講佢做嘢真係好冇交帶，經常性都留蘇州屎俾我同Chris。
「佢明知自己今日要早走就做埋啲嘢先啦，返學大晒咩。」我諗有半個office都聽到Chris嘅打字聲。

「喂？你喺唔喺公司？」夜晚七點，Matt突然打嚟我檯頭。
「咩事？」我哋梗係仲喺公司啦大哥，得你唔喺啫。
「嗰本booklet你哋放啲相點解唔係高清？我要send俾廠印喇。」佢語帶憤怒。Chris行埋嚟做口形問我係咪Matt打嚟，我點頭，然後佢撳開咗speaker。
「啊大哥，我係Chris。想同你講聲啲高清相我哋一早放晒喺Google Drive，係你話要揀嚟放，唔係我哋冇俾你。」
「喂咁你放完都通知聲我吖，唔係要我自己check呀嘛。」
「其實我有提你，Chris喺WhatsApp group都有俾link你。」我忍唔住出聲介入。先唔討論Chris對Matt有偏見，喺呢件事上道理確實喺我哋度。
「……咁你哋見我冇反應就催下啦，而家邊夠時間啫！」Matt開始鬧脾氣而唔係講道理，我同Chris對望一齊反白眼，是旦由佢發完牢騷就收咗佢線，繼續OT。



隔咗唔夠半個鐘，今次到我手提響起，我行到去pantry聽電話。
「你有冇搞錯啊？」一聽就係Matt嘅質問。「而家係你哋做漏嘢搞到我做唔切，你仲同佢一齊賴落我度？」
「你打嚟就係要撩交嗌？」我開始唔明白呢個人嘅邏輯，點解可以將所有責任都推落我哋度。「你慳返啲時間做嘢好過啦，冇人咁得閒陷害你啊，我哋都OT緊架係咁啦。」

結果我同Chris嗰晚做到九點先走，第二日大家同Matt都面阻阻咁做嘢。我終於明白點解啲人話唔好喺度食喺度屙，除咗係驚俾老細或者其他同事知會俾人閒話，仲因為會影響自己工作、影響大家合作處事、影響情緒。