轉新工唔小心勾引咗個同事: 十六、辯護

「佢……好似唔係當你同事咁簡單？」睇嚟老公係察覺到Matt同我嘅互動有啲奇怪，我要諗一個唔會影響到我哋婚姻嘅合理解釋。
「佢……追緊我。」只要將所有責任推落對方身上，我應該可以逃過一劫。
「佢唔知你結咗婚咩？」佢係懷疑緊我隱瞞自己嘅人妻身份，定係唔理解點解有人會連人哋老婆都唔放過？
「知啊，全公司都知啦。」
「之前你話同同事食飯睇戲，係佢嚟？」我老公平時只有三秒記憶，估唔到佢記得上個月我去咗邊。
「一班人嚟，Chris都喺度。」呢個係大話，但因為我老公見過Chris，而Chris由裡到外都散發住一種八婆嘅氣息，拖埋佢落水就可以減低整件事嘅威脅性。
「咁……你點諗？」

「……」
「……」



「老實講，我唔係對呢個人有興趣，但佢嘅舉動反而令我諗起我同你之間好似有啲嘢冇咗。」唔知邊度嚟嘅勇氣，我講出當初我選擇出軌嘅原因。「我覺得我哋變咗同屋住。我知道唔係你嘅問題，你都唔想而家係咁，但好多時我都自己一個人，收工又係得我，放假又係得我，一星期都唔知有幾多日係可以好似以前咁一齊放假。」的而且確，我對Matt嘅心動，80%係出於寂寞，20%係出於性慾。我唔認為當中有任何愛嘅成份，如果有嘅話，我就唔會咁易對佢反感。

「我知……但我都冇辦法……」我老公係一個好溫和嘅人，佢脾氣一向好好，所以即使面對呢個情況佢都冇遷怒於我。
「其實我知你同我有一樣感覺，所以你最近先嚟接我，係咪？」講真，以前我成日叫佢接我收工係難過登天，呢排佢主動嚟接我，我係覺得開心。
「嗯……」
「其實我係開心，我feel到你緊張我。」
「你對個同事真係冇嘢？」原來佢仲擔心緊呢樣嘢。
「嗯。」我點頭。



係咪應該要斬纜？定應該低調啲繼續發展地下情？呢刻我真係諗唔到應該點做，但既然我同Matt事先聲明我哋之間係冇任何承諾同責任，咁不如由佢順其自然，先修補我同老公嘅關係。

「搵個時間傾下。」搞掂咗一邊，另一邊又開始chur我。點解啲人會有咁多閒情逸致搞婚外情？同一時間左氹右氹，根本仲煩過返工湊老細。
「好。星期五？」老公返工啲更數開始唔定時，一定要揀佢返通宵嘅日子，以免佢失驚無神突然出現。
「OK」我同Matt嘅對話愈來愈簡短，反映我哋之間嘅距離愈來愈遠。

星期五當日，Matt一直都冇同我講夜晚要去邊。直至接近 6點，我去完廁所準備走嘅時候，先發現原來佢已經離開。正當我準備WhatsApp佢嘅時候，佢就已經send咗message嚟。
「灣仔88酒店」
酒店？吓？
「認真？」


「做咩？」
「冇……」最多都係扑嘢啫……我諗佢唔會想做陳同佳掛？扑埋呢次囉……