轉新工唔小心勾引咗個同事: 七、越界

完成咗年度報告之後，我哋team就要接住著手準備公司嘅年度活動。因為係業界監管局嘅關係，公司每逢暑假都會參加一個為期三日嘅博覽會，既要舉辦大型研討會，亦要設置攤位。淨係應付相關嘅前期工作，已經令我哋三個人非常吃力，每日都冇停手咁做到七八點先收工。三個人一齊收工食飯，然後我同Matt順路搭車，已經變成習慣。
 
起初我哋搭車都仲會保持距離，或者有啲尷尬，但慢慢愈來愈唔避忌，甚至有默契地一上車坐低佢就會提供佢嘅膊頭，而我亦會自動自覺挨落去休息。我哋之間冇人開口確認究竟我哋係咩關係，亦可能係覺得冇需要去搵一個定義，因為無論我哋係同事、朋友、情人，只要我唔係單身，我哋嘅關係點都係錯嘅。
 
一個星期五，我哋難得地可以準時收工，佢提議去睇場戲，呢次係我哋第一次喺收工食飯之後有其他節目。為咗唔想撞到同事，我哋去咗旺角新寶睇戲，全程佢都拖住我冇放過手。
「不如我送你返屋企？」Matt陪我喺大圍落咗車。
「唔駛啦，我好快返到喇。」雖然同佢一齊係開心，我今晚亦都係自己一個，但理智叫我保持冷靜，以免露出破綻惹人懷疑。正當我打算離開，佢拉住我去咗月台嘅角落攬住咗我。我一時間唔知點反應，只係聽到自己心跳得好快。當我感覺到佢鬆開手嘅時候，佢就錫咗落嚟，一手撫摸住我頭髮，一手喺我腰間。雖然有啲突然，但我冇推開佢，慢慢配合佢雙唇同舌尖。喺合上眼同佢熱吻之間，我忘記咗我左手無名指上戴住嘅戒指。
 
「我返到喇。」我開著屋企嘅燈，一坐落梳化就send短訊。
「我都就返到上水。」唔知由幾時開始，我居然係先向Matt報到，之後再知會我老公。收到Matt嘅短訊，令我唔捨得放低電話去換衫沖涼。


「其實你知我結咗婚架可？」我終於鼓起勇氣問。
「知，但我真係鍾意你。」
「但係我哋唔會有咩結果架喎。」要偷食得乾淨冇手尾，梗係要先小人後君子。事先聲明我係唔會為咗佢離婚，大家玩過就算。
「唔需要，同你一齊就夠。」