轉新工唔小心勾引咗個同事: 六、救星

作為一個已婚嘅女人，心入面點會唔知道自己嘅行為有如喺道德邊緣上行鋼線。同一個男同事單獨食飯相處、愈來愈親密嘅身體接觸、近乎調情嘅對話，每項罪證都係證據確鑿。每當我反覆拷問自己「點解要咁做？」嘅時候，我唯一可以作出嘅合理辯護就係「我軟弱」。人會喺軟弱寂寞嘅時候作出違反本性嘅決定，而我都唔例外。Matt嘅示好、關心，剛好喺係我最軟弱、最疲倦嘅時候出現，加上我身邊好耐冇出現一個我對佢有興趣嘅人，既然佢毫不避忌地討好我，相信只要我輕輕俾少少暗示，佢就一定會上釣。

今日係星期六，理應我係唔需要返公司，但因為阿姐嘅命令，我唯有犧牲假期嘅時間，返公司完成剩低嘅校對工作。
「我要返公司喇，唔知做到幾點架。」我匆匆忙忙起身，把握時間梳洗換衫。
「我今晚都要返工，你唔好做到咁夜喇。」錫咗我老公一下之後，我就出咗門口。自從佢轉咗更、我返新工之後，我哋作息時間愈來愈少交集，對話僅限於講下屋企有咩需要買、邊日約咗人。我冇開口同佢傾過呢個問題，一來佢都無能為力，二來我覺得自己好獨立，可以習慣一個人。

街上每個人都享受緊美好嘅假期，而我就要返嚟呢個空無一人嘅公司，繼續完成手頭上看似無了期嘅工作。
「你咁啱又返咗嚟？」正當我做到一頭煙嘅時候，有人拍咗拍我膊頭。
「點解你喺度嘅？」Matt嘅出現令我有啲意外。
「我好早返咗嚟喇，頭先去咗食飯，返嚟就見到你電腦著咗。」佢遞咗罐汽水俾我。「俾你喇，一齊搞掂埋佢啦。」然後拎起咗我檯上嘅稿，分咗一半就返埋自己位坐。姑勿論Matt返嚟係為咗討好我定係真心為公事，我都真係被感動，甚至有「原來呢個世界真係有救星」嘅諗法。



「你係咪check晒喇？」終於都校對晒我手上嘅初稿，等我confirm埋Matt都完成之後，我就可以send埋廠方叫佢哋準備打稿，下星期如期印刷，而我亦都安心搞之後嘅公司活動。
「搞掂，send得！」一撳「send」呢個掣，我有如釋重負嘅感覺，鬆咗一口氣。

「5點幾咋喎，你而家去邊？」我哋執埋啲手尾，準備熄燈離開公司。
「我返阿媽度食飯啊。」反正今晚都係得自己一個食飯，不如返去陪下阿媽。
「喺邊架？」
「屯門啊。」
「我陪你搭車吖。」Matt突然間話要陪我搭車返屯門，我問佢點解，佢淨係話好耐冇去過屯門，所以想行下。上到巴士，唔知由幾時開始我就瞓著咗，擘大眼嘅時候發現自己再一次挨咗落Matt嘅膊頭。我感覺到佢都挨住我，間中撫摸我頭髮。唔知有幾耐冇感受過呢種溫柔呵護，令我即使醒咗都好，都唔捨得起身坐返直，而係再合埋眼，直至佢輕輕拍醒我叫我落車為止。