轉新工唔小心勾引咗個同事: 八、會議室

Matt同我嘅關係由曖曖昧昧、行鋼線般嘅調情，正式變成明目張膽嘅偷情。每朝攬住搭車返工、夜晚OT食飯拍拖，已經成為生活一部份。有時候如果假期得我自己一個，佢都會嚟搵我行街睇戲。喺公司嘅時間我哋係同事，離開公司嘅時間我哋就係專屬於彼此嘅秘密情人，只有我哋知道大家喺對方心目中嘅真正身份。

我相信世界上嘅人偷情都係出於各種原因，有啲好明顯就係為性慾，有啲係為金錢物質，有啲係為刺激。而我，係想要有人代替我老公，喺佢缺席嘅時候陪伴我、呵護我，令我有被寵愛嘅感覺。目前我同Matt嘅發展主要都係情感上嘅交流，互相陪伴開解，分擔壓力，聆聽訴苦。

唔經唔覺，業界嘅博覽會聽日就舉行，我哋當然喺公司奮戰到最後一刻。
「你印緊咩？」我準備緊活動嘅座位表，突然有一雙手從後環抱我，將我擁入懷中。
「你唔驚咩？Chris呢？」我嚇咗一跳，想鬆開佢雙手。明明公司仲有其他人，唔怕俾人發現咩？
「Chris出咗去幫手買飯，得返我哋。」Matt愈抱愈緊，喺我耳邊輕輕咁講。佢攞起我手中嘅文件放喺影印機上，然後將我由原本背向佢，轉為面向佢，再攬住我濕吻。我第一次喺辦公室同人親熱，雖然好擔心會被同事撞破、抑或會有閉路電視影到，但同時又覺得好刺激。唔怪得啲人成日幻想喺office、戲院親熱，果然挑戰社會常規、做不道德嘅事往往都係最令人熱血沸騰。Matt嘅舌頭喺我口中愈伸愈入，雙手喺我背後遊走，一時喺後頸、頭髮，一時喺背脊順勢摸到pat pat。佢嘅體溫令我呼吸變得急促，忍唔住雙手環繞住佢條頸，雙腳趷高，將整個人貼住佢身軀繼續兩舌交纏。佢抱起我走入會議室，將我放喺會議室嘅檯上，一邊錫我條頸，一手不時喺我胸口附近移動。由我哋正式開始佢一直都忍住手，可能係有心理關口或者怕我會反感。於是，我主動將手疊喺佢手上，暗示佢得到我默許，可以放心摸落去。

「叮噹！」公司門口突然響起鈴聲，嚇到我哋即刻停低。


「喂有冇人啊？我冇帶證啊！！！」原來係Chris。
「我出去先。」Matt錫咗我一啖，就一邊整理好啲衫一邊跑出去應門。我都即刻走返去影印機附近，故作冷靜咁執返好啲文件行返埋位，然後微笑應對一眾同事，繼續嘻嘻哈哈咁食飯做嘢。

無論係出自咩原因偷情都好，我覺得偷情最難掌握嘅技巧係點樣不露破綻，明明前一秒熱情如火，但下一秒喺人前就要若無其事、抽離情緒，唔止呃全世界，仲要呃埋自己。講大話永遠都唔難，但要不被拆穿成功圓謊，先係講大話嘅蹺妙之處。