轉新工唔小心勾引咗個同事: 五、心動

「你出咗門口未？」今朝我喺大圍等緊東鐵返工，突然收到Matt嘅短訊。
「等緊車，做咩？」唔通係有突發公事要我幫手，想我快啲返公司？
「喂！」有人拍咗一拍我膊頭，原來係Matt。
「早晨啊……」我嚇咗一跳，佢唔係住上水架咩？
「一齊搭車吖！」佢若無其事咁示意我一齊排隊等車。我點會唔知Matt係特登早到嚟等我，但既然佢唔解釋，我都冇需要揭穿佢。

返工日子嘅東鐵有幾逼、有幾多人，相信都唔需要我形容。Matt為咗想我哋兩個人都上到車，佢身先士卒逼開啲人，我就企咗喺車門同佢之間。我哋兩個幾乎係身貼身嘅距離，佢仲要用手撐住車門，我感受到佢嘅呼吸，聞到佢身上沐浴露混和咗止汗劑嘅氣味。
「會唔會好逼？」Matt喺我耳邊細細聲問。
「唔會……」我唔敢望住佢，呢個距離實在太令人尷尬。
突然間東鐵急剎，車廂大部份人企唔穩向前傾，我都失去平衡而一時情急捉住咗Matt。喺我企返好嘅時候，我發現原來佢將我拉向自己，一隻手已經喺我腰間，我差少少就成個人哄埋咗佢心口。


「Sorry……唔係有心……你ok嘛？」Matt即刻縮手，似係緊張我會反感。
「冇事……」我繼續迴避佢目光，希望佢唔會發現我塊面已經紅晒。

我哋前後腳返到公司，廢事俾同事發現我哋有咩異樣。
「喂Summer，阿姐話本書呢個星期先交到俾vendor印喎。」我抬頭一望，又係Matt。佢如常地同我交代公事，好似今朝咩事都冇發生過咁。
「咁趕？未必得喎……」我負責出版公司嘅年度報告，而家只係去到校對嘅階段，突然間阿姐下令要加快進度，搞到我有啲措手不及。
「睇得幾多得幾多啦，你對唔切嘅話我幫你睇啲。」Matt以往都有幫手跟進過年度報告嘅出版同印刷，由我上任以來亦都係佢一直從旁指導。佢見我一臉苦惱，於是提出幫我手一齊做校對。

「你睇成點啊？」唔經唔覺已經去到夜晚八點，office得返我同Matt。我今日用咗大半日嚟對稿，先至完成咗三四成，雙眼睇得太耐文字仲有少少失焦。Matt行過嚟同我交代佢嘅進度，順道關心下我嘅精神狀況。
「仲有一半啊……點算啊……」有咩可能喺今個星期搞掂拎去印？我仲要幫手搞下星期個活動……諗到呢度我真係想直接喺公司瞓覺算喇。


「唔好諗喇，我哋收工食飯先啦。」Matt見我頹廢到趴咗喺檯面，輕輕拍一拍我頭，示意我要收工休息。我哋去咗公司附近嘅餐廳醫肚，再一齊搭地鐵。 

「係咪好攰？」我一坐低已經合埋眼休息，甚至冇氣力回應Matt嘅關心。然後我感覺到有人輕輕力將我個頭推向佢嘅方向，想我挨落去。
「借個膊頭俾你喇。」我真係好攰，彷彿有啲頭暈眼花，需要靜靜地瞓一覺。個膊頭借得俾我好合時，我呢刻真係好需要一個倚靠。

聽住我把聲嚟睇故事：https://jmp.sh/i2XiRXcW