轉新工唔小心勾引咗個同事: 四、初約

我之前提過我唔係單身。冇錯，我29歲結婚，而家結咗婚三年左右。老公係我嘅大學同學，大家一齊咗好耐，你可以用「老夫老妻」嚟形容我哋，但夫妻間應該有嘅甜蜜同激情都仲存在。不過因為我老公係需要輪更工作，而我就返星期一至五朝九晚六，一星期可能只有一兩日係有一整日相處，其他日子就係我返工時佢收工，或者我收工時佢返工嘅狀態。結婚咁耐我都冇嘗試過出軌，一來係懶，二來係我冇遇到對佢有興趣嘅人。如果真係遇到，我都想試下偷食其實係點。
 
講返Matt，喺嗰次活動之後佢同我短訊來往得愈來愈頻密，除咗正常講公事，就連返工打牙骹、收工放假都可能會傾偈吹水，有時講下阿姐壞話，有時講下邊間餐廳好食、連登有咩睇咁。
「食唔食返上次間餐廳？」佢突然間提返起，我以為佢當日只係講下就算。
「好啊，叫埋Chris？」話晒三個人一條team，收工食飯聯誼下好似開心啲。
「上次我淨係約你，都冇約佢。」佢咁堅持淨係想兩個人食，我冇理由唔成全佢架？

喺約好嘅當晚，Matt喺臨近收工時間先離開公司，叫我去到地鐵站再會合返佢，以免其他同事見到會誤會，最重要係唔想Chris見到。晚飯期間一切互動都好正常，除咗傾下以前做公關嘅趣事，大家仲分享下日常生活有咩嗜好。一路傾一路發現原來我哋都有啲共通點，例如大家都有去過古巴、有一齊參與過「光復屯門市鎮公園」。當呢啲細節開始日積月累，慢慢令我對佢改觀，眼前呢個人唔止同我投契，就連喜好都有啲相似，我甚至喺度諗：如果我呢一刻係單身，會唔會已經鍾意咗佢？食完飯我哋由黃埔行到去紅磡站，邊行邊講，整個對話冇一刻中斷過。
 
「返到屋企未？」Matt開始關心埋我係咪平安返到。


「返到喇，你呢？」我禮貌上都關心佢一句。
「搭緊車。你早啲瞓啦。」