轉新工唔小心勾引咗個同事: 三、人肉鬧鐘

我被吩咐喺一個星期六嘅上晝，要去到理工大學陪同主席出席活動。Matt知道之後，主動以「需要幫主席影相」，加上「Summer新嚟」嘅理由話要傍住我一齊去。
「聽朝好早喎……我都唔知起唔起到身。」我喺Chris個位同佢吹緊水嘅時候，身後嘅Matt突然間咁講。
「八點起身差唔多啦，都唔算好早啫。」我擰轉頭向打緊喊露嘅Matt講。
「咁你叫我起身喇。」Matt漫不經心地講咗句。究竟佢係戲言，純粹想開下玩笑，定係認真想我叫佢起身呢？我依然都係睇唔穿。

「聽日做完嘢食飯？」夜晚我收到佢嘅message。
「冇所謂啊。」聽日活動完咗都夠鐘食晏，一齊食都好啊。
「你搵下想食咩？」睇嚟佢想我認真搵間餐廳，再加埋今日佢叫我 morning call，案情應該冇咁單純。雖然Matt外形係幾吸引，但係我啱啱先入嚟公司，加上自己唔係單身，睇嚟都係唔適宜輕舉妄動。

「嘟嘟……嘟嘟……」星期六嘅朝早，我最後都打咗俾佢，因為我怕佢遲到最後會連累我一齊俾人鬧。


「喂……」電話另一邊傳來係Matt懶洋洋嘅聲線。
「喂？起身喇，唔好遲到啊。」自己身為AM，明知要出活動都唔較鬧鐘起身，我都冇佢咁好氣，叫完佢起身就收線，換衫出門口。

「食唔食早餐？」搭緊車嘅時候又收到Matt嘅短訊。
「我去紅磡M記，趕得切就join啦。」

「你咁快嘅？」Matt拎住個早餐坐咗喺我隔籬。今日佢冇戴眼鏡，轉咗戴con，睇落比起平時冇咁不修邊幅，醒神好多。
「廢事遲到啦，一陣仲要行過去。」我食嘢唔算快，加上係第一次陪主席出活動，所以預多咗時間。
「咁叻，起到身叫我仲早咗出門口。」Matt邊食邊講。



我哋去到理工，發現原來仲有另一位經理在場等候主席。整個活動其實就係陪主席同其他嘉賓交流合照，照顧主席所需。Matt同我被安排坐喺場地中間，喺唔需要出動嘅時間我哋都係細細聲傾偈解悶，廢事恰眼瞓被主席見到咁樣衰。

坐咗三個鐘，終於都完場。
「喂，係咪去食你搵嗰間日本餐廳？」我哋執返好啲私人物品準備離開，Matt問我。
「好啊，我去洗手間先。」
正當我去完洗手間出嚟，就見到Matt同緊嗰位經理喺度傾偈。
「一齊食飯吖，Summer你ok啊可？」Matt問。雖然本來係預咗淨係我同佢食，不過有多一個同事都冇所謂嘅。
「哦……好啊。」我連忙點頭。我哋一行三人最後去咗飲茶，冇去到我原先向Matt提議嘅餐廳。食完飯Matt話要返公司放低部電腦，經理約咗人，而我返屋企，大家分道揚鑣。

「估唔到最後係去咗飲茶。」搭車期間收到Matt嘅短訊。其實我冇咩所謂，而且經理叫到，冇理由唔一齊食嘅。


「唔緊要啦，經理喺度嘛。」
「有機會去食返。」佢覆返我。呢句類似「得閒飲茶」嘅回應，究竟係客套說話定係認真邀約？
「好啊。」

聽住我把聲嚟睇故仔​：https://jmp.sh/jzY02cHv