轉新工唔小心勾引咗個同事: 二、接觸

喺我繼續講落去之前，等我介紹下公司係做咩先。我公司係政府法定機構，負責監管住社會上某一種行業，處理投訴、違規個案、舉辦業界相關嘅活動。而我就負責公司嘅公關工作，具體講就係宣傳、教育、出版等嘅工作。
 
因為公司係新成立嘅關係，好想多啲曝光率，等市民大眾熟悉公司品牌形象，所以返工頭一星期都已經好多嘢要我著手跟進。雖然全個公關部門有我、Chris同Matt三個同事，但係我同Matt合作會比較多，而Chris因為主要處理影片、相片嘅工作，所以就比較獨立。
 
有一日，我喺上晝處理完自己手上嘅工作，就坐返自己位跟進埋啲手尾。
「你知唔知阿姐喺8樓發癲啊？」有兩個同事喺附近竊竊私語，佢哋口中嘅阿姐就係Mandy。Mandy雖然個人好豪爽，但同時情緒大起大落，好容易就發嬲西面。我打聽到原來係Matt喺寫字樓8樓會場準備緊下午搞業界活動，但係時間緊迫，又唔夠人手，阿姐大發雷霆。
既然Chris出咗去做嘢，成條team得我一個可以幫手，於是我本住捱義氣嘅精神即刻衝咗落8樓，去到場地同大家一齊排櫈貼名牌、砌backdrop移檯，最後趕得切喺活動前完成。
 
「唔該晒！」可能係Matt冇預過我會落嚟幫手嘅關係，佢見到我嘅時候神情有啲驚喜，喺講「唔該」嘅時候仲搣咗我手臂一下。我有啲愕然，心諗唔該咪唔該，做乜鳩要搣我？不過我諗可能呢位同事係比較有趣，所以冇擺喺心上。
 


自從嗰次開始，Matt就經常有意無意咁搣我手臂。我試過喺寫字樓大堂等𨋢返公司嗰陣撞到佢俾佢搣、試過喺公司pantry撞到佢俾佢搣，又或者同事之間講笑講到興起佢都會搣我。雖然就唔痛，但當次數變得愈來愈多嘅時候我就會諗，呢條友搣我嘅用意喺邊呢？
 
唔單止咁，我仲發現到其他異常嘅情況。平時我哋都會3個人食飯，或者Matt帶飯、我哋再搵其他同事一齊食，但漸漸Matt愈來愈多同我哋食飯，甚至喺Chris出去做嘢嘅日子，佢都會選擇同我單獨食飯。可能你會諗，同事間食餐飯啫，會唔會係你自己諗多咗咋？我起初都冇為意，所以繼續同佢相處，繼續俾佢搣手臂，然後……