轉新工唔小心勾引咗個同事: 一、初來報到

「Hi!你好啊，今日我第一日返工，我叫Summer。」呢間公司望落都唔算好大，不過裝修好新淨，周圍都坐滿晒同事。我喺上一間公司做咗兩年幾，休息咗一個月終於都返新工。
「你好啊！我係你同事，我叫Chris。」眼前呢個男仔身形瘦削，笑容可掬，戴上眼鏡感覺上似係一個醒目仔。佢帶咗我去一間玻璃房，門口名牌寫住「General Manager – Operations」。

「早晨啊Summer！請坐吖！今日你第一日on board，我哋lunch time會一齊食，俾你認識下啲teammate。」Mandy係公司嘅GM，亦係直接管理我呢條team。雖然面試嘅時候喺zoom已經同呢位直屬阿姐見過面，但始終面試見面同真正返工認識嘅感覺係兩回事。Mandy係一個短頭髮、身材高佻嘅女人，望落去應該40歲中至尾左右，講嘢快、直接，似係一個豪爽嘅人。

通常返工第一日都冇咩嘢做，set up下啲accounts咁又過咗半日。到咗食飯時間，Chris帶我先去餐廳坐低，等埋其他同事。隔咗一陣，Mandy同另一個男同事終於都到。
「我係Matt，今朝出咗去做嘢，啱啱先返到」呢一位就係我條team嘅assistant manager，而我同Chris就一樣都係senior officer。雖然大家職級有別，但一樣都係由GM直接管理，即係大家都係平起平坐，冇從屬之分。Matt身形比較健碩、皮膚黝黑，雖然帶眼鏡但感覺比較運動型，有啲陽光氣息。

食飯期間都係大家閒話家常，了解下公司運作。呢間公司set up咗唔夠十年，同事們都唔係做咗好耐，連Mandy呢類管理層都只係做咗兩三年。出嚟打工打得耐就會知，通常新成立又規模細嘅公司寧舍多奇怪事，仲要咁多新同事，睇嚟真係要自求多福。



聽住我把聲嚟睇故仔：https://jmp.sh/ULsrrwvb