我和六合彩發生了一段不可告人的（性）關係: 【45】

見到36號，我第一句就問佢：「你有無買到今期六合彩？」

「當然有啦，我跟足你嘅指示買架。」

「真係？」

「梗係啦！」

「你肯定無買錯冧巴呀嘛？」我好緊張咁追問佢。





「梗係無啦，4、6、22、24、36、45，我跟足嚟買架！」36號好肯定咁答我。

與此同時，佢一邊講，佢個頭套一邊喺度變大。

36號嚇咗一跳：「嘩！咩…咩事呀？」

我都呆咗咁望住佢個頭套，由一個籃球慢慢變到一個瑜伽波咁大。

「點解會架？」36露出驚訝嘅表情。





隨住頭套變大，重量增加，佢個頭越耷越低，幾乎要用盡全身嘅力先抬得起個頭。

「喂…你…究竟做過…啲咩嚟？」

「我…我…我頭先喺戰鬥嘅過程中，做咗啲犯規嘅行為…」

「下…唔…唔係呀嘛…」36號俾個頭套壓住，動作變得非常唔靈活，而且連講句嘢都好辛苦。

照咁睇嚟，剛才我喺戰鬥中犯禁嘅懲罰就係呢個。





「你知唔知…喺戰鬥中犯規…會令個頭套會大…大到我…我郁唔到…」

「對唔住，我一時為咗贏，所以先忍唔住出茅招。」我向對方鞠躬耍冧。

「食…食屎啦你！」36號好嬲咁撲埋嚟，好似想開我拖。

見佢個頭套咁大個，撼埋嚟唔得掂，我唔理咁多，拿拿臨向住前面嘅隧道口逃走。

「你條友…咪走…我要打死你…」36號笠住個超大超重嘅頭套，以烏龜咁嘅速度追我。

我就以最快嘅速度逃跑，並且一邊跑一邊道歉：「對唔住！係我錯！」

「可惡…你咪走…」36號好慢咁追過嚟。

我跑到隧道口，擰轉身，再鞠一個躬同佢say sorry：「對唔住，係我唔啱，請你原諒我！同埋時間都差唔多，我係時候要走啦，我地有緣再見，bye bye。」





道別過後，我就擰轉面，行出隧道口，隨即眼前又閃過一道白光。

大概三秒後，我從嗰條隧道返到原本住嘅劏房。

36號無追到過嚟，估計佢已經返到去屬於佢嘅地方。

雖然我嘅內心對佢有所愧疚，但點都好，返到嚟第一時間要做嘅，一定係拎起電話，打開馬會個app，check下究竟36號係咪真係有買到。

結果36號無令我失望！佢真係照住我教佢嘅方法，投注咗今期嘅六合彩！

我心情激動，振臂高呼：「Yes！Yes！Yes！今鋪我終於都得咗啦！」

「Yeah！！！」





殊不知喺同一時候，對面屋突然間好大聲Yeah咗一聲，然後隔籬屋嗰對男女又好興奮咁嗌。

之後樓上又有人歡呼兼𨂽地，同埋樓下又唔知咩事嗌曬咁好開心。

我覺得好奇怪，心諗呢班人無啦啦喺度嗌乜。

跟住我望一望部電話，發現中咗頭獎嘅派彩獎金，竟然得28萬？？？？？

下？？？我無眼花下話？？？

今期頭獎唔係二千五百萬咩？？？

之後我再睇真啲，見到今期中頭獎嘅人數居然係88個人。

唔撚係呀嘛？點解會有咁多人同我一齊中頭獎？！