我和六合彩發生了一段不可告人的（性）關係: 【46】

「嘩！咁多人中，獎金得28萬渣。」

「你28萬我又28萬，加埋有成56萬，夠我地去十幾廿次日本旅行，任買任食乜都得啦！」

隔離屋嗰對男女，好大聲咁喺度講自己中咗兩注28萬。

仲有對面屋繼續猛咁喺度Yeah。

我覺得事有蹺蹊，於是行出去走廊，拍一拍對面屋同埋隔離屋道門，問佢地係咪都中咗今期嘅六合彩頭獎。





佢地從房入面行出嚟，手上都拎住中獎嘅六合彩飛，開心到講唔到嘢。

我成個人當堂呆咗，問佢地點解會買呢幾個冧巴。

個南亞裔大叔就話佢個仔，即係嗰個百厭「星」，早幾日喺我門口，偷聽到我同幾個六合彩波講嘅嘢。

之後返到屋企，個百厭「星」話咗俾個老豆聽，後尾佢地全家就跟住呢幾個號碼買，結果就中咗。

至於嗰一對男女就因為住喺我隔籬，因為呢度啲劏房隔音唔好，我又一時無為意，唔識得收細聲量，於是就乜都俾佢地聽到曬。





除此之外，個百厭「星」唔單止話俾佢老豆聽，仲話埋俾其他細路聽，咁其他細路又話返俾佢地老豆老母聽。

就係咁一傳十，十傳百，幾乎呢棟大廈一半嘅住戶，加埋成八十幾個人都知道咗呢個秘密。

仆佢個街，本來二千五百萬嘅獎金，依家要同八十幾個人分，最後分得廿八萬…

我屌…之前幫24號賠咗十萬，再幫4號同22號佢地賠咗五萬，同埋6號呢段時間玩《神魔之塔》，猛咁課金，碌爆咗我三張信用卡，呢度都有成9萬、十萬。

幾筆數加埋差唔多有廿五萬，再計埋呢排立立雜雜嘅洗費。





例如係同36號去遊樂園玩、買啤酒俾45號等等，我所付出嘅錢同呢廿八萬獎金拼埋一齊，咁咪即係啱啱好打個和？！

屌！唔撚係呀嘛！

「滋滋—滋滋—」

就喺我悲痛欲絕之際，我個老細打電話俾我。

佢同我講由於我連續咁多日唔返工，因此決定要炒我。

「下唔好呀老細…俾次機會…」

「嘟…嘟…」老細cut咗我線。

呢一刻，我成個人灰撚咗，腦海中一片空白。





估唔到我做咗咁多嘢，到頭來居然得個吉...

我夢想嘅七百呎私樓、淫賤大波妹群p、仲有提早退休嘅大計，統統都只係南柯一夢。

「可惡啊！你地快啲俾返啲錢我！」

傷心過度嘅我，一時情緒失控，想搶走嗰班人手上中獎獎卷。

而對方就梗係唔俾返我啦，之後我地大家喺走廊你推我撞，搞搞下驚動埋差佬，最後仲上埋新聞。

啲記者影到我個樣，並配上一個咁樣嘅新聞標題：「同棟大廈88人中頭獎，一男子情緒失控打人。」

後來我用咗差唔多三個月，先至接受到自己無咗二千五百萬呢個事實。





呢段期間，我都有keep住買六合彩，可惜無辦法再中一次。

當時我喺戰鬥中犯規，令36號個頭套變到好大，行動變得唔方便，導致到佢超過五十期都無開過出嚟。

24號就依然都係咁抽得，每隔幾期都會贏一次，但就無再同另外五個波一齊開出嚟。

另外4號同22號偶爾會一齊出現，相反6號同45號就打回原形，變返做冷門號碼。

睇嚟4、6、22、24、36、45呢串號碼只可一不可再。

唉...之前咁難先中到一次頭獎，但啲獎金俾人分薄曬，呢種感覺真係好唏噓。

或者真係學似許冠傑話齋：命裡有時終須有，命裡無時莫強求。

然而喺呢件事之中，我學識咗一樣嘢，就係講秘密嘅時候，千其唔好講得太大聲，否則俾人聽到就大撚獲架啦！





屌！


（全文完）