我和六合彩發生了一段不可告人的（性）關係: 【44】

成功中到六個號碼，家陣唯一要擔心嘅就係36號有無按照我嘅吩咐，買到呢期六合彩。

我喺心入面不停咁祈禱，求神拜佛希望佢有買到。

另外，我地六個中獎號碼贏咗之後，原來係會有個小獎勵。

我同24號佢地都被送到一間房入面浸溫泉。

據說呢度嘅溫泉有療愈作用，浸咗之後身上嘅傷就好得好快。





頭先我心口同手手腳腳都瘀咗，浸咗一陣感覺好似真係好咗。

除此之外，我亦都好好趁呢個機會，好認真咁多謝佢地五個。

如果唔係佢地咁落力去戰鬥，我未必贏到呢個頭獎。

因此，我企起身向佢地鞠躬，表示最衷心嘅謝意。

「拿！都話咗我地應承得你嘅嘢，就一定做到架啦！」4號同我講。





「係呀，啱先真係全靠你用棒球嘅技術掟22號出去，咁先至贏到30號。」

「咁我呢？我迷迷糊糊，唔知自己做過啲咩就贏啦，真係奇怪。」45號啱啱酒醒，對於剛才嘅戰鬥有啲模糊。

事實上佢係乜都無做過，只係醉下醉下咁就贏咗。

而咁多個入面，我最多謝一定係24號。

佢唔單止喺第五個回合，一個抽贏三個，兼且喺第四個回合，仲孭住受傷嘅6號，以一敵十，無佢咁搏命嘅話，6號都唔會爬到上去嗰張櫈。





24號就好謙虛咁話：「我都係盡力而為啫，同埋之前我累你要賠錢俾人，家下幫你贏返啲錢，咁我地算係一筆勾銷啦。」

「仲有我打機課金嗰啲錢，都無數架啦。」6號同我講。

「點都好啦，總之我真係好多謝好多謝你地！」

我再三衷心多謝完佢地，接下來應該就係道別嘅時間。

唔使再過好耐，我身上嘅「轉移效應」就會消失，之後我就要同佢地分開。

坦白講，雖然我地相處嘅日子唔長，感情亦都唔算深厚，甚至佢地成日闖禍，搞到我雞毛鴨血，只不過呢一段短暫嘅相處日子，絕對會成為往後我一段難忘嘅回憶。

我希望佢地以後可以繼續戰鬥，繼續為其他人帶嚟希望。

「記住，你地每一場嘅戰鬥，背後都盛載無數市民嘅期望，為咗佢地，你一定要繼續戰鬥落去！」





「知架啦，我地會將攪珠機當係甲子園，一直戰鬥落去，好好咁守護每個人想發達嘅夢想同希望！」22號回答我話。

其他人聽到，都好認同咁點一點頭。

道過別，浸完溫泉，我地就俾人帶返去百子櫃入面。

喺呢個過程中，我突然有一陣暈浪嘅感覺。

隨即，眼前閃過一道白光。

大約三秒後，當白光消失，我就由百子櫃瞬間轉移到一條隧道入面。

第一眼我見到36號，向住我迎面行過嚟。





我見到佢頭頂笠住個頭套，跟住我再摸一摸自己個頭，發現頭上嘅頭套唔見咗。

咁即係話，我地身上嘅「轉移效應」已經消失，彼此終於互相交換返身份。

如果無估錯嘅話，穿過呢條隧道後，我就會返去人類嘅世界，36號就會返去馬會。