我和六合彩發生了一段不可告人的（性）關係: 【41】

依家我地已經中咗四個冧巴，只要再中多個就有三獎。

三獎嘅獎金最少都有差唔多兩皮嘢，有時少啲人中，獎金多起上嚟隨時會有八、九萬。

家下我爭緊人錢，中咗三獎就算還唔曬，都起碼可以還住一半先。

而接落嚟呢第五個回合，就要睇24號表現。

經過頭幾輪嘅激戰，大部分攪珠波嘅體力都已經有所下降，24號亦都唔例外。





佢抹一抹臉上嘅汗水，指住頭先有份撞跌佢嘅30號、49號同17號，做出挑釁嘅手勢。

佢地互相睥住對方，眼神充滿怒氣。

第一個先採取攻擊嘅係30號，佢一嚟就跳起，由上而下用個頭攻擊24號。

24號第一時間避開，跟住49號同17號相繼出手攻擊。

「嘭！」





「嘭！」

「嘭！」

24號以一敵三，喺場地嘅中央大戰一個紅色波同兩個綠色波。

其他人見到佢地打得咁激烈，都唔敢行埋去，選擇喺企喺外圍位置觀戰，順便休息抖下氣。

只見佢地四人不斷用個頭互相攻擊對方，而且攻擊嘅速度都非常之快，堅硬嘅頭套互撼互碰，撞出一下又一下激烈嘅火花。





咁樣三個打一個，24號好明顯處於下風。

見到佢啲手手腳腳都俾人撼到傷咗，但佢都依然堅持住，唔俾自己跌低，兼且仲嘗試搵機會反擊。

後來經過一輪又一輪密集嘅攻擊，30號佢地幾個人嘅體力開始下降，動作漸漸變慢。

先係17號腳軟無力，速度跟唔上24號。

繼而49號開始喘氣，塊面出曬汗。

唯獨係得30號仲有力，可以keep住攻擊。

見到敵人嘅勢頭減弱，呢個時候24號就睇準時機反擊。

佢先fake一fake，扮用頭去攻擊，引17號伸個頭出嚟擋，接住下一秒佢立即縮開個頭，轉用手一拳打落對方塊面度。





17號塊面食咗一下重拳，當堂頂唔順跌低咗，

跟住輪到49號想出招，但24號喺佢攻擊前，就搶先一步用個頭頂落佢心口，令佢無得出手之餘，仲不堪倒地。

最後要對付30號，24號反而選擇硬碰硬，頭頂頭。

佢地頭上嘅紅色嘅頭套同藍色頭套激烈對撞，霎時間，場內響起震蕩嘅金屬撞擊聲。

雙方力量不相伯仲，打成平手。

不過24號夠醒目，頂頂下突然間退後，導致到對方用力過猛，收掣唔切，直接向前撲咗出去。

與此同時間，呢個回合嘅倒數嚟到最後一秒。





張櫈一落地，24號就坐上去，然後快速升起。

其他人望塵莫及，只能睇住對手成為今晚第五粒攪出嚟嘅號碼。