我和六合彩發生了一段不可告人的（性）關係: 【42】

呢一刻喺場上面得返44個波，假如我可以贏到呢個回合，咁呢期嘅六合彩頭獎就將會屬於我。

單計實力，我知自己好難同佢地抗衡，只但係咁多年嚟，我嘅夢想就係中六合彩頭獎，依家難得有個機會，可以親手俾我去爭取，咁無論點，我都要拼盡全力博一博。

第六個回合開始之後，我唔理三七廿一，一鼓作氣向前衝。

以前有句說話叫做「盲拳打死老師傅」，呢刻嘅我心口掛住個勇字，毫無章法咁亂衝亂撞，諗住以無招勝有招。

結果試咗之後先發覺，原來係呢招唔work嘅。





我衝入人堆之中，以為用個頭亂咁撞就可以撞開曬啲人，點知人地兩下手腳就將我打低。

我嘅心口俾堅硬嘅頭套撼埋嚟，感覺就好似車撞咁，痛到裂開咁兼抖唔到氣。

雖然真係好痛，但我係唔會就咁認輸架！

好快我又起返身，再同佢地搏命。

「嘭！嘭！嘭！」





我不顧一切，用個頭四周圍去撞，腦入面淨係諗住一樣嘢，就係「我要中頭獎」。

然而強大嘅決心，係無法彌補實力上嘅差距。

我嘅攻擊對人地嚟講就好似𢯎痕咁，相反，人地求其一下攻擊，就將我打到趴低。

我同自己講，邊度跌低就邊度起返身，於是忍住痛企返起身，重新再戰。

一次唔得就再嚟第二次，兩次唔得就第三次。





直至去到第五次，我又俾人撼低仆咗落地下，心口同兩隻手仲有膝頭哥都瘀曬。

呢個時候我意識到，假如再同呢班人硬碰硬，我係完全無勝算。

眼見呢個回合嘅時間所剩無多，若然再無辦法突破僵局，咁我就只能屈居三獎。

頭獎同三獎嘅獎金爭成幾個零，係幾萬蚊同兩千萬嘅分別，試問呢個時候又點可以就咁放棄？

18…17…16…

時間一秒一秒咁流逝，我好心急咁諗緊有咩方法令自己反勝。

15…14…13

最後十秒倒數，喺緊急關頭，忽然之間靈光一閃，俾我諗到一條「橋」。





既然硬碰硬打唔贏，咁不如就試下用茅招。

我諗返起嗰本《六合彩手冊》，上面寫住戰鬥過程中禁止使用插眼、撩陰等茅招。

條文中列明，假如使用呢啲不當招數嘅話，攪珠結束後就會受到嚴重嘅懲罰。

佢講到明係攪珠完咗先有懲罰，咁如果我喺比賽中用嗱喳招，咁就算罰都係完咗先至罰。

等到我身上嘅「轉移效應」消失後，就會同36號互相交換返身份，咁即係話，到時要受懲罰嘅係36號，而唔係我。

雖然我知咁樣做係好好好好仆街，只但係中頭獎嘅機會可能就得呢一次。

為咗勝利，為咗二千五百萬嘅獎金，為咗扭轉我呢條死窮撚嘅人生，就算係仆街仔都要做一次架啦！





11...10...9...

時間無多，唔理啦，衝啦！