我和六合彩發生了一段不可告人的（性）關係: 【40】

我地六個人之中，得返我、24號同6號依然喺場上。

由於我地上幾個回合合作得太明顯，所以其他人開始針對我地。

第四個回合一開波，其他嗰啲波即刻衝埋嚟對付我地。

佢地由四方八面將我地重重包圍，然後蜂擁而上。

假如高處望落去，呢刻嘅情景應該就好似動物大遷徙咁，乒鈴嘭唥向住同一個目標衝刺。





面對來勢洶洶嘅對手，除咗24號可以勉強抗衡到之外，我同6號基本上毫無還手之力。

我就無戰鬥經驗，而6號就有傷在身，戰力不足。

「你條木嘴唔係36號！」35號同37號一邊大嗌，一邊飛身撼落我個膊頭到。

「啊！！！」我痛到大嗌咗一聲，成個人向後跌咗落地。

屎忽落地嗰下，爭啲櫈親條腰骨。





之後28號、34號同38號，呢三個女人趁想我病攞我命。

佢地不斷埋身，用個頭起勢咁撞我。

雖然佢地撞埋嚟嗰陣，心口對波會挨落嚟我度，但我一啲都唔enjoy，淨係覺得好痛。

而喺我挨打嘅同時，喺另一邊廂，6號都俾幾個人頂到飛咗上天。

佢飛到差唔多三層樓咁高，然之後又喺三層樓咁高嘅地方跌落嚟。





好彩嘅係，24號及時衝過去接住佢，否則咁樣撻落嚟，佢肯定又會再傷多兩錢重。

「多謝！」6號感激24號嘅出手相救。

「之前我整傷咗你，家下救返你一次，我地以後當無數啦。」24號同6號講。

「好！不過我要你再幫我多一個忙。」

「咩忙呀？」

6號無回答24號，而係直接騎上對方嘅膊頭。

「喂！你…你想點？」

6號指住嗰張吊喺半空中嘅鐵櫈，大嗌一聲：「我地衝過去！」





24號即刻就心領神會，知道6號想用騎膊馬呢招。

於是下一秒佢就孭住對方，奮勇向前衝。

呢招騎膊馬的確係幾有諗頭，6號騎喺24號上面，咁其他波就攻擊唔到佢。

只不過24號咁樣孭住一個人，身手亦變得唔靈活，無辦法出手防禦，只能不斷避開人地嘅攻擊。

眨下眼，時間好快又進入到讀秒嘅階段。

24號一路跑一路避，就算有人撞過嚟，但都死頂住，唔俾人撞低。

呢一刻嘅佢就好似一個美式足球員，喺場上奮力狂奔。





唔同嘅係佢唔係帶住波，而係孭住一個人。

24號全程全速推進，直接殺入心臟地帶。

時間得返五秒，見到24號殺到埋身，30號、49號、17號等呢班有實力嘅攪珠波，決定聯合埋一齊，對付衝緊埋嚟嘅對手。

佢地一個撞落去24號個肚度，一個就撞佢個頭，仲有一個就大大力撼佢嘅背脊。

縱使24號非常抽得，但面對幾個對手咁強烈嘅攻擊，佢都係招架唔住，當堂就成個人慣低咗。

就喺佢跌低嗰一個瞬間，佢膊頭上嘅6號向前飛身一跳，伸手捉住嗰一張正喺空中降落嘅櫈仔。

30號佢地見到咁嘅情況，第一時間救撲過去想拉返6號落嚟。

6號就搏曬老命，攬住張櫈死都唔放手。





好快時間倒數到最後一秒，當張櫈落地之後，喺櫈上面嘅嗰個人就係勝出者。

儘管6號個pat pat無坐實張櫈，但佢攬住張櫈就當佢贏。

因此喺直播室嘅威威宣佈：「今期第四個攪出嚟嘅號碼係，6號。」