我和六合彩發生了一段不可告人的（性）關係: 【39】

頭兩個回合，24號佢地合力想保送但唔成功，所以我提議改變策略。

我叫曬佢地過嚟，同佢地講：

「我覺得我地依家嘅策略應該要掉返轉，你地應該要搵機會贏咗先，而我呢個最弱嘅就留到最後，假如你地五個都贏咗，咁最後就算我贏唔到，都起碼有個三獎，唔使輸得咁肉酸。」

「但如果我地揼低你，咁你咪…」

我同24號講：「唔使擔心，我應該捱得住死唔去嘅。」





「好！既然你咁講，咁呢個回合就睇我表演啦！」4號啱先投出精彩嘅一球，依家信心大增。

佢打算用返上一round嗰招，等到讀秒階段，就睇準時機偷襲。

頭嗰三十秒，啲波喺度打生打死，等到最後十秒倒數，6號就主動變成一粒攪珠波，俾「投球手」4號拎到手上。

4號再一次施展佢嘅投球技術，但好可惜，今次佢一掟出去嗰陣，力度同方向都控制得唔好，搞到掟歪咗。

6號飛得好遠，唔知飛咗去邊。





同一時候，呢個回合嘅時間只剩低五秒。

為咗將功補過，4號決定今次自己嚟。

佢自己變成一個波，喺地下度左碌右碌，避開曬啲人，靜靜雞咁碌到去場地最中心嘅位置。。

佢呢個碌嚟碌去嘅方法，睇落好似幾聰明，但實際卻隱藏好大嘅風險。

因為假如一個唔小心俾人踩到嘅話，咁就一定會受重傷。





好在4號今日有啲運，無俾人踩到不得止，亦都無俾人發現。

而經過上兩個回合嘅激戰，30號體力有所下降，所以今個回合佢無乜點參與戰鬥。

反而17號同49號就鬥得激烈。

佢地先將其他人打到一仆一碌，跟住再好似兩隻牛咁，互相用個頭頂住對方，喺度鬥大力。

只要是但一方唔夠力，咁嗰個人就會俾人頂走。

無記錯嘅話，49號嘅戰績僅此於30號，至於17號就近期狀態大勇。

因此佢地兩個鬥得難分難解。

至於嗰張櫈仔，差唔多要由半空降落到地面。





4號就趁呢個時候碌到去二人嘅腳邊，跟住「啵」一聲變身成人，並順勢由下而上，同時間撞開17號同49號。

呢一招令對手出其不意，而且非常奏效。

當嗰兩個波想還擊之際，4號已順利登上寶座，揮一揮手離開戰場，成為今晚第三粒攪出嘅號碼。