我和六合彩發生了一段不可告人的（性）關係: 【38】

戰鬥繼續，第二回合開始。

同上個回合一樣，一開波大家就你推我撞，互不相讓。

而24號就再次連同4號、6號、22號為我開路。

今次佢地一嚟就直接列陣衝刺，想用最快嘅速度霸佔有利位置。

佢地四個人手挽手連成一直線，然後好似一部推土機咁，使出一招橫掃千軍，撞走曬擋喺前面嘅攪珠波。





喺四人嘅護送之下，我成功佔據到場內最中心嘅位置。

嗰張櫈仔就喺我地嘅頭頂，只要等佢降落嚟，咁我就能夠坐上去，成為第二粒中獎號碼。

只但係攻擊容易防守難，當我地佔領住中心陣地，咁自然就成為咗其他攪珠波嘅目標。

廿幾三十粒波幾乎同時由四方八面向住我地衝埋嚟。

呢個時候，4號、6號、22號、24號分別企喺我前後左右兩邊。





佢地拼盡全力，用頭上堅硬嘅頭套抵禦來自四方嘅攻擊。

「嘭！嘭！嘭！嘭！嘭！嘭！」

頭套同頭套之間激烈碰撞，場內響起接連不停嘅金屬碰撞聲。

雖然佢地幾個已經極力抵擋，但可惜雙拳難敵四手，更何況呢度加埋有成40幾個波，俾一大堆人圍住嚟砌，更加係難以抵擋。

首先先係有傷在身嘅6號俾人撼低，無幾耐4號同22號都捱唔住，俾七、八個波夾埋撞到唔知飛咗去邊。





最後剩返24號同我喺度苦苦抵抗。

敵人個個如狼似虎，面對幾十個對住自己使出「鐵頭功」，我地根本無辦法招架。

最終我地兩個捱唔住猛烈嘅攻擊，被迫敗陣撤退。

攪珠前，24號所提出嘅「弱者先行強者殿後」嘅策略，似乎真係行唔通。

感覺我好似拖累緊佢地，令佢地發揮唔到應有嘅水準。

望住時間一秒一秒咁流逝，呢個回合時間得返唔夠十秒。

30號一夫當關，揸住盾牌頂走曬身邊所有嘅攪珠波，一個人佔據住最有利嘅位置。

佢身為攪珠次數最多嘅波，實力果然名不虛傳。





懸吊喺上空嘅鐵櫈漸漸降落到佢嘅面前。

時間只剩返三秒，今個回合我地已經打定輸數。

然而呢個時候居然仲有人未放棄。

呢兩個人竟然仲要係4號同22號。

佢地二人企喺場地嘅最外圍，距離中心好遠。

22號突然間「啵」一聲，由人形狀態變返一粒波。

然之後，4號揸住22號呢粒波，雙手舉起，單腳抬高，做出投球嘅姿勢。





跟住佢大嗌一聲：「高速平飛球！」

下一秒，佢就出盡全力，將手上嘅22號波掟出去。

個波一離手，就好似粒子彈咁，以極高速嘅速度，對住30號飛埋去。

我諗只係用咗零點幾秒嘅時間，22號就飛到30號面前。

就喺個波飛到埋身之前，22號及時由一個波重新變成人形狀態。

剛才4號嘅炮彈式投球，衝力非常之大，因此22號就食住那股衝擊力，狠狠咁用堅硬嘅頭套，「嘭」一聲撞爆30號手上嘅盾牌，繼而再頂開對方，飛身坐上勝利嘅寶座。

估唔到呢兩條友識得活學活用，竟然諗得出呢一招。

30號成個人呆咗，本來佢以為呢次實食無黏牙，點知半路殺出個程咬金。





呢一刻嘅佢，就咁眼白白望住22號坐喺櫈上，成為今晚第二個攪珠號碼。

雖然原定嘅計劃並唔順利，但點都好，家陣我地已經有兩個波贏咗，再中多一粒就有七獎30蚊。

咁當然，我地嘅目標點止中三個號碼咁少。

威威宣佈完第二個中獎號碼，隨即就進入第三個回合。