我和六合彩發生了一段不可告人的（性）關係: 【37】

進入最後十秒倒數嘅時間，位處中心地帶嘅爭持變得非常激烈。

啲攪珠波摞埋一堆，你撼我我撼你，大家都互不相讓。

9號趁30號唔注意，從後襲擊，狠狠咁撞落對方嘅背脊，30號即刻被撞開到十幾米咁遠。

當9號以為自己得逞之際，49號一招黃雀在後，用個頭一嘢頂落去9號個屎忽度，令到9號當堂趴咗喺度。

而就喺咁混亂同激烈嘅戰況中，45號卻以一沉一浮嘅腳步，一步步咁向住中心位置走近。





49號見45號行近埋嚟，諗住衝前撞走佢，但估唔到45號竟然一個迷蹤步，避開咗對方嘅攻擊。

49號攻擊無效，反過嚟衝得太恆，收唔切掣撞落其他波身上，間接幫45號撞走幾個對手。

隨後，屢敗屢戰嘅9號連同8號，一齊向45號作出攻擊。

佢地一個對住佢個肚撼埋去，另一個就想頂佢條腰。

結果45號忽然間一下企唔穩，叉錯步，誤打誤撞同時避開咗兩邊嘅攻擊，並且更導致到8、9號頭碰頭互撞。





見到45號呢一個迷下迷下嘅狀態，令我諗起細個睇電視見到成龍耍醉拳。

明明佢連行步路都行到歪曬，但偏偏就係呢種捉摸不定嘅步法，令佢過關斬將。

時間只剩最後三秒，嗰張櫈仔準備降落到45號面前。

眼見45號準備坐落去，呢個時候啱先俾撞到十幾米咁遠嘅30號，揸住盾牌，正以最快嘅速度，向住45號衝埋去。

對手來勢洶洶，我心諗今次45號應該避唔開架啦。





殊不知，佢竟然無避，直接用個頭去抵禦。

30號跑住咁撞埋去，撞擊力必然大過45號。

只不過佢無諗到，佢咁樣一撞，直接將45號送到埋去張櫈上面。

45號俾對方撞到背脊黐落櫈背，呢頭佢個屎忽坐落去，嗰頭40秒嘅回合時間就正式結束。

半秒後，張櫈載住45號，急速升上最高點。

同時威威宣佈：「今晚第一個攪出嚟號碼係，45號。」

就係咁，49個波撞嚟撞去撞餐死，最後卻俾一個醉酒佬屎忽撞棍，贏得今期第一個攪珠號碼。