我和六合彩發生了一段不可告人的（性）關係: 【36】

「…我地先介紹下今日嘅監場嘉賓…」

六合彩主持人威威逐個介紹監場嘅太平紳士。

同時間，我地49個波蠢蠢欲動、摩拳擦掌，準備好嚟一場肉白相見、埋身肉搏嘅戰鬥。

縱觀咁多個波之中，除咗原本嘅36號，仲有28號、32號、34號、38號等十個波都係女仔。

望落佢地嘅身材都幾鬼正，有前有後不得止，而且仲有肌肉線條，呢種身形真係正過唔少女model。





至於喺我左右隔籬分別係35號同37號。

佢地兩個都係男人，身形非常之高大。

35號望住我，露出非常疑惑嘅表情：「36號，無見你一排，做乜唔同咗樣嘅？」

「下有咩？我咪又係咁嘅樣，係你眼花啫。」我詐傻扮懵。

「唔係駁，無見一排，你心口兩舊肉都唔見埋。」37號接住講。





我用力夾一下個胸，擠出一條肥仔波乳溝，show俾佢地睇：「嗰兩舊肉其實仲喺度，只不過係縮咗水啫…」

「...即刻開始我地今期嘅六合彩攪珠。」

呢個時候，主持人威威宣佈，今晚嘅六合彩攪珠正式開始。

一聽到話攪珠開始，我身邊嘅35號同37號，就好似一支箭咁標出去。

除咗佢地之外，其他全部攪珠波都向住戰場上嘅中心位置直衝。





因為只有越接近中心地帶，咁先越有機會爭到張櫈仔。
 
「嘭！！！」

十幾個波從四方八面頭撼頭咁撞埋一齊，激撞出強烈嘅火花，並產生咗一下極巨大嘅聲響。

我距離咁遠，都完全感受嗰種強勁嘅震蕩力。

隨後，24號佢地幾個人嚟到我嘅面前。

按照原定計劃，佢地排成一行，擋喺我面前為我開路。

「嘭！」

「嘭！」





「嘭！」

佢地用頭上嘅頭套撞開擋路嘅攪珠波。

一開始都好順利，但當越接近中心地帶，攪珠波之間嘅爭持就越激烈。

呢一刻差唔多有成十幾個波喺度撞嚟撞去。

當中30號尤其勇猛。

佢左手揸住盾牌，擋開曬其他人嘅攻擊，之後好似隻牛咁，彎低腰全力衝刺，用個頭一口氣撞開七八個對手。

見到30號狀態咁fit，24號建議大家並排成一直線，一齊加速衝埋去頂走佢。





三！二！一！當24號數到第三聲，咁全部人包括我就烏低身、頭向前，一口氣向住30號衝埋去。

點不知45號條友仔，啱先行路嘅時候都算行得穩，只但係一跑步就失曬魂，完全跑唔到直線。

佢跑咗兩步就叉錯腳仆低，兼連累埋隔籬嘅4號同22號，搞到佢地都摞低埋。

其他攪珠波見到我地露出破綻，即刻衝埋嚟撞散我地。

17號、13號同2號三個人，同時飛身撼個頭埋嚟，我地幾個好似保齡球樽咁俾人撞到散開兼飛起。

我同24號一齊被撞飛到半空之中，背脊撼落玻璃幕墻然後再跌返落地下。

跌嘅時候，我係心口落地，因此感覺非常之痛苦。

而另一邊廂，4號、6號、22號就唔知被撞走咗去邊。





唯獨是45號腳步浮浮，但又好快起到身，兼且居然無俾人撞走。

我地望一望投影喺地下上面嘅倒計時，本來40秒嘅回合時間，依家只剩低10秒。

懸掛喺半空中嘅櫈仔，呢一刻正慢慢降落。

呢個回合所剩嘅時間唔多，我地幾個波各散一方，照咁嘅情況嚟睇，24號打算護送我做第一個攪珠號碼嘅計劃，基本上已經宣告失敗。