我和六合彩發生了一段不可告人的（性）關係: 【35】

根據24號之前提出過嘅策略，佢認為一開波應該先合力幫最弱嘅號碼贏咗先，然後其他人再殿後。

本來6號有傷在身，理應係佢地之中戰鬥力最弱，但家陣多咗我呢個完全零戰鬥經驗嘅人在陣，自然我就變咗最弱嗰個。

因此佢地打算一開波第一個回合，先護送我做第一個攪珠號碼。

「…一陣間我地五個會幫你開路，你咩都唔使理，直接跟住我地向前跑就得架啦…」

24號講講下，突然從外面傳嚟一把聲音。





一把成日會喺六合彩攪珠聽到嘅聲音。

無錯！呢把聲就係嚟自於「六合彩之子」威威。

喺節目開始之前，佢同一班幕後工作人員喺度吹水打牙骹。

我地呢度聽到曬佢地講嘅嘢。

「…嘩！大阪個環球影城多人到呢，好玩係好玩，但人實在太多，同埋地方大得滯，一日都行唔曬，反而香港嘅迪士尼細細地好行好多。」威威講緊佢去環球影城嘅經歷。





跟住有個工作人員應佢：「聽講東京嗰個迪士尼樂園都好好玩。」

「呢個我都諗住下次暑假帶個仔去，除咗大阪個環球影城，新加坡嗰個我都去過，都算幾好玩，不過新加坡啲嘢食一般般，都係日本嘢正啲…」

如果無估錯，36號應該就係從威威口中，聽到過呢啲人類世界吃喝玩樂嘅事。

威威講得咁仔細又咁動聽，難怪36號聽完會想去遊樂園玩。

吹咗一陣水，時間差唔多，威威都準備要出去主持節目。





同時之間，我同其他攪珠波都被送到去攪珠機。

平時我地喺電視見到嘅攪珠機，上面排列咗49個波，下面就係一個透明嘅球形攪珠裝置。

事實上，呢個只係我地人類表面見到嘅攪珠機。

真正嘅攪珠機，內裡其實係一個類似古羅馬鬥獸場嘅地方。

成個場係一個大圓形，面積接近有兩個室外足球場咁大。

喺場地嘅上方，覆蓋住一層透明嘅玻璃幕牆。從玻璃中可以見到直播室內天花板嘅燈光。

我地49個波按住順序排列，圍成一個大圈，企喺圓形場地嘅外圍。

我地所有人身上都係無著衫，淨係得一條底褲。





而喺場內正中間嘅位置，懸吊住一張鐵造嘅櫈仔。

我地日常所見到嘅攪珠機，裡面正中央有一條空心嘅柱，啲波攪下攪下跟住會跌入去條柱中間嘅窿位，然後再升起個波，咁樣就為之攪出一個中獎號碼。

但真實嘅攪珠戰鬥，就係49個波衝去爭嗰張櫈仔。

每一個戰鬥回合為四十秒，當數到第四十秒，嗰張櫈仔就會從半空降落至地下。

最快坐到上去嘅第一個攪珠波，就係第一個中獎號碼。