我和六合彩發生了一段不可告人的（性）關係: 【34】

睇完嗰本手冊我就擺返低，房入面有各種嘅健身器材，其中一樣係一個大鐵球。

由於攪珠波主要係用頭上嘅頭套作攻擊，因此我判斷呢個鐵球係平時俾佢地練習用嘅。

個鐵球懸吊喺間房嘅中心，我行過去，嘗試用佢嚟練習一下。

我對準個鐵球，用個頭一嘢用力撼落去，「嘭」一聲，個鐵球俾我撞到彈開。

只但係好快個波好似盪千秋咁，又盪返嚟我面前。





我一時反應唔切，結果就俾個鐵球「嘭」一聲撞落個頭度。

我個頭連埋個頭套，好劇烈咁震咗一下，震到我個人暈坨坨，當堂企都企唔穩。

再過多幾秒我就頂唔順，直接暈低咗，瞓咗落地。

到再醒返嘅時候，我就已經俾人帶到去一個叫「熱身場」嘅地方。

買過六合彩嘅人都知，喺臨開獎十五分鐘前，六合彩就會暫停投注，而呢十五分鐘原來就係各個攪珠波嘅熱身時間。





「熱身場」係一片空曠嘅沙地，49個波可以喺度自由熱身、拉筋、跑動。

除此之外，大會亦會趁呢個時間公佈今期每個號碼嘅投注人數。

結果就顯示喺一幅3D嘅投影畫面上。

今期嘅投注結果顯示咗出嚟之後，所有人嘅注意力都集中喺投影畫面上。

今期最多人買嘅號碼，係近期以及歷史戰績最好嘅30號，其次就係聽落好意頭嘅18號同8號。





再對落啲就係24號，至於我呢個36號嘅排名就相對較後， 只係排第40名，睇嚟今期啲人都唔係幾睇好36號。

而30號作為今期最多人投注嘅號碼，原來係會獲得好處。

喺佢手上，將會得到一塊盾牌作為護具。

塊盾牌睇落去非常堅硬，可以用作阻擋對手嘅攻擊，所以呢個係一個好大嘅優勢。

投注嘅結果公佈完後，大家就繼續熱身。

呢個時候，24號搵埋4號、6號、22號同45號一齊行過嚟我面前。

24號同我講：「你放心，陣間我地一會出盡全力幫你贏個頭獎返嚟！」

「甲子園就去唔到啦，但既然返得嚟呢度，咁無論如何我地都會繼續戰鬥落去，我同22號一定全力幫你！」4號同22號都表示支持。





「之前應承得你嘅嘢，我唔會反口嘅，你幫我過咗一關打贏咗個波士，今次輪到幫你中返一次六合彩。」6號笑一笑同我講。

「無錯！我飲咗你咁多啤酒，係時候還...還...嘔...」45號講講下突然嘔咗出嚟。

呢條友睇嚟仲未酒醒。

不過點都好，見到佢地每個人堅定嘅眼神，睇嚟我之前講嘅嗰一番說話，佢地有聽入耳。