我和六合彩發生了一段不可告人的（性）關係: 【33】

我先打開個衣櫃，見到入面掛住好多條藍色嘅底褲，每一條都係同一樣嘅款式。

睇嚟呢啲全部都係36號嘅底褲。

喺衣櫃隔籬有一張檯，檯上面咩都無。

然後我踎低𥄫一𥄫，發現有字典咁厚嘅書攝喺檯腳。

我將本書掹返出嚟，封面上面寫住《六合彩手冊》。





揸住本書，我行去梳化坐低，慢慢揭開睇下。

裡面分咗幾個章節，頭一章就係講六合彩波嘅起源同歷史。

內容基本上同36號同講我過嘅一樣。都係話六合彩之神降臨，創造49個六合彩波，為香港帶嚟幸運之類。

第二章就關於攪珠戰鬥嘅一啲規則，例如講到每個對戰嘅回合為40秒；每個人頭上嘅頭套為主要嘅攻擊武器；除咗頭套亦可以利用身體任何一個部分作出攻擊。

另外係戰鬥過程中，禁止插眼、撩陰等嗱喳招。





揭揭下，揭到書嘅第三個章節，其中一頁終於提到「轉移效應」。

上面寫得好清楚，攪珠波同人類之間唔適宜有過於親密嘅身體接觸，否則就產生轉移效應。

而亦都正如24號所講，七日之後「轉移效應」就會消失。

依家係第六日，換句說話講，我同36號最快聽晚先會交換返身份。

不過問題係，36號依家唔喺我身邊，唔知到時我地可唔可以遙距咁轉移返身份。





第二個問題就係，假如六合彩重開攪珠，而我地又未交換返身份，咁我就要代替36號上戰場。

好彩我夠醒目，一早有預計過呢個情況，所以預先同36號講定，假如我俾馬會啲人當係攪珠波咁捉咗去，咁第一件事我就叫佢開住我部電話，隨時check住馬會個投注app有咩最新消息。

一旦馬會重新開放六合彩投注，我就吩咐佢用個app投注4、6、22、24、36、45呢六個號碼。

開頭佢唔識用個app，我仲花咗半個鐘頭教佢點用。

希望佢仲記得嗰啲步驟，千其唔好甩碌，一定要買啱我地呢幾個號碼。

若然喺六合彩重開之前，我同佢無辦法交換返身份，咁我就只能頂硬上。

雖然之前有聽過24號形容過，攪珠波之間戰鬥嘅情景，但我從來無親身體驗過，亦都唔知對手有啲咩人。

我有啲擔心自己無辦法應對咁激烈嘅戰鬥。





然而喺擔心嘅同時，我都覺得呢刻我變成攪珠波，都未嘗唔係一件好事。至少我可以有機會親自贏個頭獎返嚟。

咁當然，淨係我一個人係無辦法贏得頭獎，我仲需要4號、6號、22號、24號以及45號嘅努力同配合。

唔知佢地聽完我嗰一番說話，有無重新振作起嚟？

唔知佢地有無記得返身為攪珠波嘅職責同使命，以及佢地曾經對我許下嘅承諾，一齊合作幫我中一次六合彩頭獎？