我和六合彩發生了一段不可告人的（性）關係: 【32】

「砰！砰！砰！」

幾個煙霧彈係我地身邊爆開，與此同時，兩架直升機喺天台著陸。

嗰班著住整齊嘅裝備嘅回收隊，拎住麻繩同網，衝過嚟將我地幾個擄走。

由於事出突然，我地幾個都未反應過嚟，就經已俾人夾手夾腳夾咗上直升機。

而且呢班人全部都係認波唔認人。





佢地見到我頭上有個頭套，以為我係攪珠波，所以就拐走咗我。

至於真正嘅36號就一個人被遺留喺天台，眼白白咁睇住我地幾個人被帶走。

吸入過煙霧彈嘅煙霧，令我感覺到不適，過咗一陣我頂唔順仲暈埋。

當我清醒返嘅時候，就發現自己由一個人變咗一個波，並同其他嘅攪珠波，俾兩個馬會職員帶到一間房。

變身…變身…變身…





我用36號嘅方法，喺心中默念三次「變身」，嘗試由個波變返人，跟住想逃走出去。

可惜試一次唔得，第二次都唔得，想再試第三次嘅時候，我就已經俾人放入一個百子櫃入面。

百子櫃有好多一格格嘅細櫃桶，我就俾人放入其中一格。

而櫃嘅表面有明顯被熏黑過嘅痕跡。

原本我以為個櫃咁細，入面一啲係好窄好細，殊不知櫃入面原來有另一個空間。





入到個櫃入面，我見到前面有一道自動門。

嗰道門打開之後，有一股吸力就將我呢個波吸咗入去。

當一過咗嗰道門，我就「啵」一聲，突然間又變返一個人。

呢一刻，我見到自己入咗一間好大好大嘅房。

保守估計，呢間房嘅面積起碼有1000呎。

房間以淺藍色為主調，牆身同天花板都係淺藍色。

除此之外，房入面有梳化，有床，有檯，有衣櫃，仲有一大堆健身器材，包括跑步機、啞鈴、單槓，同埋一個特製嘅鐵球。

莫非呢間房就係攪珠波住嘅地方？平時36號就係住喺呢度？





如果係嘅話，佢地攪珠波住嘅地方，的確係大過我間垃圾劏房好多。

唔怪得佢地個個見到都話我住得細啦。

嗰道門閂埋之後就鎖住咗。

我試過拍門、撞門，但道門都係打唔開，所以想出都出唔到去。

後尾我諗返起之前聽24號講過，佢地有一本《六合彩手冊》，入面有講到「轉移效應」。

於是我就喺間房入面周圍行下，搵下有無呢本手冊。