我和六合彩發生了一段不可告人的（性）關係: 【31】

「搞咩呀，無啦啦捉我地上嚟，仲收咗我地個棒球同漫畫！」4號表示十分不滿。

「咪係囉，明明我轉緊珠打緊波士，你又突然收走部機！」6號亦都向我投訴。

「你地兩個唔好嘈，聽我講！」

等佢佢兩個收咗聲，我就繼續講：「如無意外，我同36號聽晚就會交換返身份，到時我就會將你地全部波交還俾馬會…」

「下？咁快？」





我都未講完，6號就打斷我嘅說話：「唔係呀嘛，隻game我都未玩完，我唔想咁快返去。」

「咪係囉，我想繼續留喺度打棒球，唔想返去啊。」4號又話。

「但你地唔返去嘅話，咁六合彩咪攪唔到珠，咁我個頭獎點算呀？你地幾日之前先應承過我，話會全力以赴幫我贏六合彩頭獎架喎。」

22號就話：「但我地都未玩夠，唔想咁快返去。」

「係呀！我都未飲夠！」45號醉下醉下，突然彈一句出嚟 。





之後6號對住我講：「其實我地呢幾個攪珠波，咁多年嚟都困喺同一個地方打嚟打去，感覺真係有啲厭倦。」

「講得無錯！我地49個波打嚟打去都唔知為乜！」4號同22號都即刻表示同意。

而36號雖然無出聲，但都有點頭同意佢地嘅說話。

呢個時候，我突然間有啲後悔。

當初我執佢地返嚟，好似帶壞咗佢地咁，令佢地忘記咗自己本身嘅天職同使命。





「唉...」

我好無奈咁歎咗一口氣，然後語重心長咁同佢地講：

「我明白你地嘅心情，可能咁多年嚟嘅戰鬥令你地感覺到厭倦。但你地知唔知，對我呢啲窮人嚟講，每一期六合彩代表住啲咩？

代表住嘅係一個希望。一個脫貧嘅希望，一個改變人生嘅希望。

儘管呢個希望只有一粒塵咁渺小，但對我以及對全香港嘅窮人嚟講，呢粒塵就係支持我地繼續生存落去嘅動力，等我地相信一日未死，人生或者仲有一絲希望。

因此，你地每一次喺攪珠機入面嘅戰鬥，都盛載住每一位市民對未來、對生命嘅期盼，你地嘅戰鬥係充滿意義！

為咗守護我地每一個人心入面渺小嘅希望，我懇請你地繼續為我地戰鬥落去！」

佢地六個波聽完我呢番說話，全部都靜咗無出聲。





之後佢地望住我，好似有嘢想講，但又唔知點開口。

然而喺同一時候，突然間周圍颳起一陣大風。

我地見到有兩架直升機正駛近天台。

機上面，有一班著住香港賽馬會嘅制服嘅人。

呢班人來勢洶洶，好明顯就衝住幾粒攪珠波而嚟。

同上次遇到嘅唔同，今次呢班人絕對係有備而來。

佢地呢次唔單止有完整嘅裝備，兼且連煙霧彈都出動埋。