我和六合彩發生了一段不可告人的（性）關係: 【30】

4號同22號喺度睇漫畫，6號淨係掛住耷低頭轉珠。
 
45號就仲hangover緊，溫溫燉燉，都唔知有幾多說話聽得入耳。
 
36號算好少少，只不過就係一路聽，一路恰眼訓。
 
見到呢班友咁嘅樣，我忍唔住要開聲話佢地：「喂大佬呀，今鋪我食粥食飯睇你地架啦，唔該可唔可以留心啲、上心少少？」
 
「放心啦，我地攪珠攪咗咁多年，有曬經驗，知點做架啦！」4號一邊睇漫畫，一邊同講。
 




22號同意4號嘅說話：「啱呀，24號啱先講嘅嘢，其實我地個個都知啦！總之應承得你，我地就一定全力以赴，幫你贏個頭獎返嚟！」
 
「係呀！係呀！」
 
6同45號連聲附和，36號亦都叫我放輕鬆，唔使咁擔心。
 
雖然佢地係咁講，但見到佢地hea下hea下個樣，真係好難放心得落。
 
而事實亦都一如我所料，之後嗰三日，呢幾粒攪珠波日日就淨係掛住玩，睇佢地玩到個心都創曬，就嚟連六合彩係咩都唔記得。
 




如今嘅我唔單止銀行存款等於零，兼且仲爭緊人十幾萬。
 
我已經將人生所有希望，都託付喺呢幾個六合彩波身上。
 
佢地唔嗲唔吊嘅樣，實在令我好擔心。
 
仲有一日左右嘅時間，我同36號身上嘅「轉移效應」就會消失，到時變返正常人，咁我就會將呢幾個波交還俾馬會。
 
如果佢地以咁嘅狀態出戰，莫講話頭獎，我諗連七獎三個冧巴都中唔到。
 




唔得！我唔可以俾呢件事發生！
 
我唔可以俾呢班友繼續hea落去！我一定要點醒佢地，要佢地認認真真咁對待嚟緊嘅六合彩攪珠！
 
第一件事，我先收走4號同22號既棒球同漫畫，再收走6號手上既iPad，跟住用凍水兜頭淋45號塊面，等佢清醒清醒。
 
最後再喺樓下公園捉埋36號上嚟。
 
加埋24號，終於湊齊六個波。
 
之後我將呢幾條友「的」上天台，對佢地嚴肅訓話。
 
至於點解要特登上天台，咁係因為唔知係我錯覺定係點，最近我發覺好似有人成日喺門口出面，偷聽我地喺屋入面嘅說話。
 
隔墻有耳，上嚟天台無乜人，方便啲講說話。