我和六合彩發生了一段不可告人的（性）關係: 【29】

截至目前，其他失散嘅攪珠波都已經俾馬會搵返，所以，呢六個波係我依家唯一可依靠嘅攪珠波。
 
根據琴日24號嘅講法，我同36號身上嘅「轉移效應」，七日後就會消失。
 
今日係第三日，大約仲有四日我就會同36號互換返身份。
 
我打算等我地交換身份後，就主動還返六個波俾馬會。
 
因此呢幾日嘅時間，一定要好好利用。
 




最起碼要同佢地一齊制定一個可行嘅合作方案，同埋研究出致勝嘅策略。
 
於是到咗夜晚，我就拉佢地一齊開一次作戰會議。
 
咁多波之中，24號最好打，因此由佢率先發言。
 
佢認為6號有傷在身，目前戰鬥力相對比較低，所以佢提議一開波，就結合五個人嘅力量，幫6號成為第一個攪珠號碼，跟住就到4號同22號。
 
「咁45號呢？」我問24號。
 




「45就第四個，然後到36號，我就留守到最後。到時我必定會竭盡全力，協助其他人。」24號同大家講。
 
先幫實力弱啲嘅波贏咗先，實力較強嘅就殿後，咁聽落似乎係一個可行嘅策略。
 
「噔噔—」
 
咦？咩聲？
 
突然間，我聽到門口好似有聲。
 




之後我出去睇，但打開門唔見有人。
 
我覺得有啲奇怪，不過無理太多，返入屋繼續討論。
 
24號講完策略，就開始分析一下主要嘅敵人。
 
佢話論整體實力，30號係最勁，其次係49號，不過佢又話49號最近狀態一般。
 
反而17號勢頭幾猛，最近二十期入面贏過七期，因此不容忽視。
 
「噔噔—」
 
呢個時候，門口外面又傳出聲音。
 
我即刻再行出去睇下。




 
啱先我聽到一啲腳步聲，不過同頭先一樣，打開門卻唔見有人。
 
頂，咩料啊！究竟咩人喺我門口chit chat咁轉！？
 
我企喺門口望咗一陣，都唔發現到有人。
 
無奈之下只能閂返道門，行返入屋，繼續開作戰會議。
 
然而從頭先到依家，成個作戰會議淨係得24號同我出過聲。
 
其他人完全無講過嘢，而且仲一啲都唔留心。