我和六合彩發生了一段不可告人的（性）關係: 【28】

以免4號同22號再生事端，我將佢地兩個「的」返屋企。

開頭佢地唔願意，係要我左氹右氹，好似氹細路咁，先至氹到佢地返屋企。

出咗去一陣，好彩嗰幾個留喺屋企嘅攪珠波，無周圍搞搞震。

6號一見到我返嚟，就拎住部iPad衝到我面前：「玩玩下部機無咗畫面，點解會咁嘅？」

「我諗應該係無電啫。」





「咁快啲幫我整到佢有返電！」6號好心急。

「OKOK，我依家幫你叉電。」我將部iPad插上叉電線。

當部機有返電之後，個mon就有返畫面。

估唔到6號玩《神魔之塔》，只係玩咗短短幾個鐘，就已經玩咗咁多關。

更加估唔到嘅係，佢揮金如土，係咁買魔法石，係咁課金。





個遊戲account係連住我張信用卡，粗略估計，呢短短幾個鐘之內，佢經已課咗成皮嘢。

咁搞法，我張信用卡遲早俾佢碌爆。

「Er…呢隻game其實都唔係幾好玩，不如我介紹第二隻俾你玩。」

我諗住換隻無得課金嘅game俾6號玩，但佢唔制，係都話要繼續轉珠。

「話時話，呢一關我打嚟打去都打唔贏，你知唔知點先可以打死呢隻怪？」6號問我。





「我都唔知喎，呢隻game我都好耐無玩，其實有另一隻遊戲都幾好...」

我都未講完，6號就話：「如果你幫我過到呢關，我就接受同24號合作，幫你贏下一期嘅六合彩。」

「下？真係？」

6點一點頭，好肯定咁回答：「係！我6號講得出就做得到！咁唔該你幫幫手啦？」

我無諗過遊戲嘅吸引力，竟然可以令6號轉軚轉得咁快。

隨後，我用咗大約半個鐘同佢一齊轉珠，但轉嚟轉去都轉唔贏。

最後無辦法下，唯有再課多幾千銀買魔法石，抽到啲勁嘢，先至可以順利過關。

雖然又使咗一筆錢，但都係嗰句：「下期六合彩頭獎有二千五百萬，只要贏到返嚟，咁就咪都抵返曬啦。」