我和六合彩發生了一段不可告人的（性）關係: 【27】

「對唔住，我頭先隻手有啲跣，所以一時唔小心飛咗支棒球棍出去。」22號同個車主解釋。

「一句對唔住就想當無事發生呀？」車主好嬲。

「都同你講咗對唔住，咁你仲想點！」我身旁嘅4號突然間加把嘴埋嚟，

「喂！你地做錯嘢仲咁大聲！」

「咩呀！講嘢大聲都唔得呀！」4號講講下，頂個頭埋去，作勢想開拖。





我見識過頭套嘅威力，知道「鐵頭功」唔嘢少，陣間拳腳無眼，撼死人就大劑。

於是我拿拿臨拉開4號同22號，並叫佢地唔好再出聲。

轉過頭，我就問個車主呢單嘢想點拆。

「仲使問嘅，梗係賠錢啦！」

「咁…你想賠幾多？」





佢舉起五隻手指：「我要五萬蚊賠償費。」

「你架車好似凹咗少少渣喎，使唔使賠五萬蚊咁多？」

「你知唔知我架車係Tesla，你知唔知Tesla入廠維修係幾揦脷，仲有你知唔知我架車新買，淨係揸住半個月就俾你地支棍整凹咗，你知唔知我個心依家好撚痛！精神損失費唔使賠呀！」

唉我屌...無耐之前先賠五皮嘢俾人，家下銀行個戶口仙都唔仙下，邊度再嚟五皮嘢賠俾佢。

「點呀！你賠定唔賠？我話你俾聽，我老豆係律師嚟架，如果你唔肯賠，我就叫佢告到你地甩褲！」個車主警告我。





「呢位先生，我最近就有啲手緊…五萬銀就無啦…可唔可以爭住先？」我好客氣咁問個車主。

「唔撚係呀嘛，你地三個麻甩佬連五皮嘢都拎唔到出嚟，有無窮到咁呀！」

呢條友聲大夾惡兼串柒柒，我真係有一下衝動，想用我頭上嘅頭套頂瓜佢。

不過見呢度有細路望住，我費事嚇親佢地。

最後都係要經過一番磋商，個車主先勉強同意俾我爭住先。

「拿，呢度白紙黑紙寫到明，你爭我五萬蚊，」個車主揸住張欠條再三警告我，「到期前你如果還唔到，咁我就帶埋我老豆嚟搵你！Understand？」

雖然呢一刻我條氣係好唔順，但欠條唔簽都簽咗，我只能自己同自己講：

「下期六合彩頭獎有二千五百萬，只要贏到返嚟，咁就咪都抵返曬！」





而事實係，加埋之前嗰筆數，我依家已經爭人十幾萬。

假如呢幾粒攪珠波幫唔到我贏下一期六合彩，咁到時我可以諗定申請破產都得啦。

但既然我都已經洗濕咗個頭，接住落嚟亦都只能選擇相信佢地。