我和六合彩發生了一段不可告人的（性）關係: 【26】

坦白講，見到銀行戶口家下無曬錢，我真係覺得好撚肉赤。

下一期頭獎二千五百萬，我衷心希望我嘅付出，最後可以換到回報。

返到屋企，4號同22號見到我買咗棒球同棒球棍返嚟，開心到彈起，仲叫我即刻帶佢地去棒球場打波。

佢兩條友一唱一和，係咁喺度囈我，我想唔答應都唔得。

跟住我上網查一查，發現香港原來得幾個地方棒球，而且全部都離我屋企好遠。





所以我都係近近地帶佢地落樓下公園度玩就算。

雖然唔放心俾其他攪珠自己留喺屋企，但我更唔放心4號同22號自己出去外邊。

到時又搞出咩「大頭佛」，咁就大檸樂。

趁仲個天仲未黑，我幫佢地著好衫，然後就帶佢地落樓下個公園「放電」。

個公園靠近馬路，地方唔算好大，但平時都有唔少家長鍾意帶啲細路嚟玩。





咁啱隔籬屋個百厭「星」細路都同其他細路喺度玩緊，佢見到我，又向我舉咗一下中指。

4號同22號望咗一眼呢個公園，發現呢度並唔係棒球場。

「咦？呢度都唔係棒球場嚟嘅。」

「咪係囉，漫畫入面個棒球場都唔係咁嘅。」

我就話：「無所謂啦，揸住個波、拎住碌棍，邊度玩都一樣啫。」





「唓~有無搞錯呀~」

雖然佢地有啲唔滿意，但一場嚟到又點會就咁走。

佢地一人企一邊，4號拎住個波，大嗌咗一聲，用力掟個波出去。

佢掟出去嗰下嘅力量非常之大，個波就好似子彈咁從佢手上飛出去。

至於揸住棒球棍嘅22號就望準個波，用盡全力揮棒。

唔知係佢隻手太跣，定係無揸實個柄，當佢一揮動支棒球棍嘅時候，成支棍就喺佢手上fing咗出去。

支棍飛咗上天，然後喺好高嘅地方跌落嚟，跟住「砰」一聲，啱啱好砸中停喺公園對出馬路，一架私家車嘅車頂。

我心諗：今次仆街啦！





趁個司機未搵到嚟，我拿拿臨帶佢地兩個走。

只但係22號唔肯走，仲話要去執返支棍，與此同時，4號就去咗執波。

私家車嘅車主拎住嗰碌棒球棍，來勢洶洶咁向住我地行埋嚟。

唉慘啦，走唔切啦…

「支棍係咪你地掟架？」個車主揸住支棒球棍問我地。

「係呀！多謝你拎返過嚟俾我地。」22號伸手去攞返支棍。

嗰個車主即刻縮開手，唔還返支棍不得止，兼且仲好嬲咁講：「我頂你個肺！你知唔知你支棍砸到我架車凹咗！」