我和六合彩發生了一段不可告人的（性）關係: 【25】

喺對面街，有班人喺度拍緊戲。

當中有個男演員好粗暴咁摑打一個女演員。

24號信以為真，第一時間就衝過去救嗰個女演員。

佢對住嗰個男演員拳打腳踢，過程中更唔小心整爛埋人地啲攝影器材。

之後劇組嘅人想阻止佢，但都俾佢打傷咗，最後要我大聲喝停佢，佢先至肯停手。





拍拍下戲成檔嘢咁樣俾人扠喎咗，個導演就梗係嬲撚到仆街。

佢擔住口煙，衝埋嚟捉住24號，猛叫佢賠錢。

24號見到自己俾人捉住，突然大嗌一句：「我係死基佬！」

個導演嚇咗一跳，即刻縮開手。

同時間，劇組嘅其他人以及街上面經過嘅人，全部都呆咗咁望住24號。





「基…基...基佬咁又點呀？基佬就可以阻住我地拍戲架咩？屌你老母！」導演破口大罵。

「你話咩拍戲呀，我都唔知你講乜！」24號反駁。

咁嘅情況，睇嚟都係要我出面解決。

我將手上嘅棒球棍同棒球交俾36號揸住，然後同個導演講：「Sorry，我朋友只係一時衝動，佢無心架，如果要賠錢嘅話，我嚟幫佢賠。」

「你攬上身，咁即係你係佢條仔啦。」





「我唔係佢條仔，我只係幫佢賠錢啫，你想賠幾多？」我問個導演。

個導演扯兩口煙，數數手指，計咗一陣就話：「呢鋪無十皮嘢你都走唔甩架啦。」

「咩話？十萬蚊咁多？」

「你自己計下，呢條友打傷我啲演員同攝影師，整爛埋我部camera，醫藥費加camera嘅錢，呢度都已經五六皮嘢啦。」

導演扯一口煙，繼續講：「家陣我地成隊crew嘅拍攝進度，就俾佢一條友拖慢曬，你知唔知我地之後補拍要使多幾多錢？十萬蚊算收少咗你啦！」

「打個八折，八萬蚊得唔得？」我嘗試同個導演講價。

「你都霎戇嘅，你估依家街市買餸有得講價？總之呢十萬銀你賠撚梗架啦，唔賠嘅話，我就即刻call差佬嚟！」

對方企得好硬，完全無情講。





為咗唔好搞大件事，我唯有替24號賠錢。

我同個導演講：「我銀行戶口依家得五萬蚊，剩低嗰五皮嘢，我遲啲再還俾你得唔得？」

「可以，不過要寫張欠條，同埋留低你個電話號碼仲有屋企住址。」導演對住我噴咗一啖煙。

「咳咳！好，無問題。」

大家傾掂數，我就去附近嘅ATM㩒咗五萬蚊出嚟，並簽下一張五萬蚊嘅欠條。

事後24號終於意識到自己闖咗禍，所以同我道歉。

「對唔住，係我搞到你要賠錢俾人。」





「幾皮嘢濕濕碎啦，下一期六合彩頭獎有二千五百萬，你幫我贏返嚟，咁咪乜都抵返曬囉！」

「好！到時我一定會竭盡所能，全力以赴，幫你贏返啲錢返嚟！」

「有你呢句，咁我就放心啦。」