我和六合彩發生了一段不可告人的（性）關係: 【24】

我同24號返入屋，呢個時候6號同36號已經醒咗。

瞓完一覺，36號又恢復返精神：「啱先你同24號去咗邊？係咪偷偷出咗玩唔預我？」

「梗係唔係啦。」

「棒球呢？喺邊呀？」4號同22號衝埋嚟問我。

「都未買，陣間先啦。」





同一時候，6號行落床，鬆一鬆啲筋骨，我問佢：「琴日搽咗啲跌打酒，有無好返啲？」

「好似好返少少。」

「有用嘅話，咁你就繼續搽多啲啦。」我將支跌打酒放喺當眼嘅位置，等佢隨時可以拎嚟搽。

而45號呢隻醉貓，我就唔得理佢咁多，由得佢醉生夢死。

截至目前一刻，我一共集齊咗六個六合彩波。





唔計6號唔肯同24號合作，就當佢肯合作，但六個波其實都未夠。

假如有多兩三個波幫手，咁我地團隊先會變得更強大，勝算更有把握。

所以我決定今日繼續去搵其他失散嘅波。

然而為免隔籬條姣婆再過嚟勾引24號，我決定帶埋佢同埋36號出去一齊搵。

其他人就留喺屋企看門口。





4號同22號只要有漫畫睇，基本上就唔會亂咁周圍走。

45號就掛住飲酒，可以唔理。

6號則有傷在身，行動不便，但佢喺屋企好似無乜嘢做。

見佢好似好無聊咁，我就喺櫃桶拎部iPad出嚟，求其開咗隻《神魔之塔》俾佢解下悶。

呢個時候嘅我無預料到，呢一個舉措將來會令我荷包損失慘重。

今日嘅天氣好熱，我同36號、24號由香港出九龍，再從九龍出新界，搵咗三、四個鐘，都無任何收穫。

無幾耐，馬會個投注app彈出咗一條最新嘅通知。

內容寫住：「數天前，本會總部不幸發生了火災，雖然目前善後工作進度良好，但火災期間，有一部分攪珠球不幸遺失了。好在經過連日的努力，本會的職員已尋回大部分遺失的攪珠球。





現在尚餘4、6、22、24、36及45還未尋回，本會將會繼續搜索。當尋回所有攪珠球後，就會重開六合彩，敬請留意。」

照馬會嘅講法，即係除咗我收集到嗰六個波之外，其他失散嘅攪珠波都已經搵返。

咁唔怪之得今日搵嚟搵去都搵唔到其他波啦。

唉！係咁嘅話就無辦法，我地再搵落去都無意義，只能打道回府。

返屋企之前，我地經過一間體育用品專門店。

我行入去買咗兩粒棒球同一支棒球棍，帶返去俾4號同22號。

但估唔到我只係買少少嘢，行開咗一陣，24號居然就搞出咗個「大頭佛」。