我和六合彩發生了一段不可告人的（性）關係: 【19】

我所住嘅劏房位於北角一座唐樓。

入到屋，24號望一望個環境，講咗同36號、45號同一番說話：

「呢度就係你住嘅地方？估唔到你地人類住得咁細。」

佢地個個都咁講，我真係好知佢地平時住嘅環境又有幾大。

「咦，你地返嚟啦。」45號無嚟神氣咁坐喺地下，似係啱啱酒醒。





返屋企前，我特登去超市買咗一打啤酒。

45號見到我將啲啤酒放入雪櫃，馬上兩眼發光。

「嘩！啤酒啊！」

我遞咗一罐俾佢：「唔好飲咁多，一罐好啦。」

「哈哈！好嘢！」 佢打開罐啤酒，飲咗一啖，成個人當堂精神返曬。





至於36號琴日因為無咗個頭套，而導致成晚都訓唔著。

今日知道自己幾日後可以變得返攪珠波，終於鬆咗口氣，所以一返嚟就爬上上格床度瞓覺。

我就打開背囊，將今日搵到嘅6號、4號同22號，放喺櫈上面。

唔知佢地係因為變身次數嘅限制，定抑或受驚過度，遲遲都未肯變身露出真面目。

除咗36號之外，45號同24號都係男人，唔知呢幾個又會係男定女呢？





等咗一陣，6號波率先現身。

佢都係一個男人，仲要係一個阿叔。

同其他攪珠波一樣，佢全身赤裸，左邊膊頭同右邊膝頭腫起咗一舊，睇落似係受咗傷。

佢環顧一眼四周，當見到24號嘅時候，就露出不屑嘅眼神：「真係冤家路窄，咁都喺度撞到你。」

「我承認嗰次係我重手咗，不過我都耍過冧啦，你唔係仲嬲緊下話？」

「哼！唔嬲就有鬼！你搞到我膊頭同膝頭傷得咁重！」

從佢地呢段對話聽得出，24號同6號應該有啲過節。

再過多陣，4號同22號都陸續「啵」一聲變身為人。





佢地兩個一矮一高，都係男人。

矮嘅個鼻好大，高嗰個就個嘴好大。

計埋佢地兩個，我呢間100呎嘅劏房，依家一共有七個人喺度。

原本細小嘅空間呢刻變得更加狹窄。

「呢個地方咁細嘅？邊度嚟架？」4號同22號不約而同問我 。

「呢度係我屋企。」

如果無記錯，呢個問題我已經答咗第四次。





而呢一次我決定「打蛇隨棍上」，向佢地咁多個人，正式提出我嘅請求：

「你地見我住得咁細，就知我好窮啦，所以我搵你地返嚟，其實係有一事相求。我想請你地六個人一齊合作，幫我喺下一期六合彩攪珠贏個頭獎返嚟。」