我和六合彩發生了一段不可告人的（性）關係: 【20】

「唔得！」

6號第一個出聲say no：「先唔講我地攪珠波係習慣單打獨斗，好少合作，而且就算要合作，我都唔會同呢個人合作！」

佢口中嘅嗰個人就係24號。

之後佢繼續講：「呢個人喺今年第72期，搞到我個膊頭同膝頭重傷，所以我係唔會同佢合作!」

「都話一直唔小心重手咗，你唔係咁小氣下話？」





「係囉，你可唔可以俾個面我，同佢合作一次咁多？話曬我都喺部攪珠機度救過你出嚟，最多你有咩要求，我都盡量滿足。」我同6號講。

「酒！我要酒！」45號喺隔籬又醉咗，無啦啦站亂歌柄。

「唔得！」6號一口否決。

「咁你兩個呢？」我擰轉面問一問4號同22號。

「我無乜所謂。」22號答。





「我都係。」4號同22號一樣，都話無所謂。

「不過除咗6號之外，我同22號其實都係有傷在身。」4號擰轉個背脊，指住一處拳頭咁大嘅瘀傷。

22號就話佢大髀拉傷咗，仲未好返。

接住我就問佢地係幾時整親。

佢地話好耐之前，喺一次攪珠對戰中受傷。





一旦受傷後，戰鬥力就會減弱，因此就會出現連續好多期都贏唔到嘅情況。

我拎起電話，又上去六合彩個網，翻查記錄。

唔計特別號碼，我發現4號同22號已經超過20期無攪過出嚟。

以前我買六合彩，見到有啲號碼成廿幾三十期都無開過出嚟，覺得好奇怪。

佢地今日呢番說話，都算係解答我多年嚟心中嘅疑問。

原來除咗係因為實力唔夠之外，仲可能係因為受咗傷，所以導致連續多期都無法成為攪珠號碼。

雖然每個攪珠波都有自愈嘅能力，但療愈嘅過程十分緩慢。

呢個時候，我醒起屋企有支跌打酒。





我拿拿臨拉開櫃桶，拎咗支藥酒出嚟。

「呢度有支跌打酒！我幫你地捽下，或者會幫到你地。」

45號一聽到個「酒」字，就即刻伸手過嚟搶：「跌打酒？咩味架？我又要飲！」

「呢啲跌打酒係攞嚟搽，唔係攞嚟飲架。」

我撥開45號隻手，然後擰開支跌打酒，倒少少落手心。

6號傷得最重，所以我先幫佢搽。

「嘩好痛啊！」





6號痛到即刻縮開咗個身，我就叫佢忍住唔好亂郁。

「你呢啲咩嚟架，擦落個身度熱辣辣嘅！」6號問我。

「都話係跌打酒，我地人類有咩頭暈身㷫都係搽佢。」

「係咪真係有用架？」

「有無用試下咪知囉。」