我和六合彩發生了一段不可告人的（性）關係: 【18】

24號望住我同36號諗咗一陣，然後問：「你地最近係咪有一啲好親密嘅身體接觸？」

「搞嘢算唔算呀？」36號搶住回答。

「咩係搞嘢？」24號問。

「即係兩個人剝曬衫瞓喺…」36號毫不掩飾，直話直說。

為免尷尬，我不得已要打斷佢嘅說話：





「其實呢搞野就係兩人瞓喺度，我搞下你，你搞下我咁囉，總之一句講曬，我同36號曾經係有過親密嘅身體接觸。」

「咁唔怪之得啦，如果我無記錯嘅話，人類同攪珠波係唔夠能有太親密嘅接觸，否則就會出現『轉移效應』。」

「何謂『轉移效應』？」我追問。

「就即係好似你地依家咁，36號嘅頭套轉移到你身上。」

24號講完，36號就問：「咁你知唔知有咩辦法解決？」





「呢層又唔使咁擔心，七日後你地應該就會變返原狀。」

「真係嘅？你點知架？」36號追問。

「我記得《六合彩手冊》上面寫住，若然攪珠波同人類有過於親密嘅身體接觸，咁就會出現『轉移效應』。」

「咦，聽你咁講好似又係喎，我好似都有啲印象。」36號話。

「所以你肯定，七日後我地會變返原狀？」





「如果我無記錯嘅話，應該就係啦。」24號答我。

聽完佢咁講，我算係暫時放低咗心頭大石。

琴日夜晚我同36號搞完嘢，跟住佢個頭套就轉移咗落我頭上，琴晚加埋今日，時間已經過咗一日半。

即係話，再過多五日半，我同36號兩個就會互相交換返身份。

「好啦，時候都唔早，多謝你救咗我，無乜嘢我就先告辭啦。」24號鞠一個躬，向我再次道謝，然後就轉身離開。

「等陣！」我上前叫停佢。

「我有一個請求，睇在我救咗你一命嘅份上，你可唔可以幫我一個忙？」

「請講。」





「我想你加入我地，一齊合作贏下一期嘅六合彩頭獎！」

「好！無問題！你係我嘅救命恩人，啱先你救咗我一次，咁我就幫返你一次！」

估唔到24號咁爽快，諗都唔使諗，直接就一口答應我。

咁啱喺同一時候，有船靠岸。

我喺背囊拎咗件面衫同褲俾24號著，跟住就同佢同埋36號，以及背囊入面三個攪珠波，一齊返屋企。