我和六合彩發生了一段不可告人的（性）關係: 【17】

「屌你老母，你邊撚度架！我地喺度收數，你就學人做架兩！」一名紋身大漢好惡咁拎住西瓜刀指住24號。

「我嚟自香港賽馬會。」24號好冷靜咁回答。

「我賽你老母呀！兄弟我地一齊上！」

紋身大漢一聲令下，其他人揸住西瓜刀同鐵通，圍攻24號。

本來我同36號諗住上去幫拖，點知24號身手原來非常之了得。





佢一身鋼條身形，拳來腳往，再加上無堅不摧嘅頭套，打到班公仔佬一仆一碌。

我一邊觀戰，一邊用電話上六合彩個網check下，發現24號嘅實力只係僅次於30號同49號。

唔怪得佢咁好抽啦！

班古惑仔見自己打唔贏，居然使出嗱喳招。

其中一個人喺褲袋攞咗隻噴髮膠出嚟，衝埋去兜口兜面噴落24號塊面度。





24號俾啲啫喱水揦到眼都擘唔開，嗰班古惑仔就趁機會捉住佢，將佢推出欄杆外。

下一秒，24號成個人跌咗落海。

由於事出突然，我同36號都嚟唔切出手阻止。

奸計得逞後，班古惑仔立即散水

至於24號睇嚟係完全唔識得游水，佢喺海入面不斷咁掙扎。





過咗無幾耐，佢仲驚到縮細變返個波，慢慢咁沉落大海。

咁嘅情況，無理由見死不救。

我吸啖大氣，飛身一嘢跳落大海。

碼頭嘅海水好凍好渾濁，我潛入水底，伸手撈起嗰粒向下沉嘅攪珠波。

而頭套嘅重量令我要用多幾倍嘅力，先可以浮返上水面。

上到岸，24號「啵」一聲變返人形狀態，之後佢一邊咳一邊嘔返啲海水出嚟。

我就凍到打冷震，係咁打乞嚏。

「36號多謝你，多謝你救咗我！」





24號望咗我一眼，以為我係36號，當佢再望多兩眼，即刻改口：「咦唔係喎，你唔係36號，你係邊個？」

呢個時候，真正嘅36號行過嚟睇下我地有無事。

24號用手抹走面上嘅海水，望一望36號，再睄咗我一眼。

佢覺得好奇怪，問我：「點解會咁嘅，點解36號嘅頭套會去咗你度？」

「你問我，我都想知。」我答佢。