我和六合彩發生了一段不可告人的（性）關係: 【16】

36號見我無啦啦俾人追，未意識到發生咩事，跑上嚟問我。

「後面嗰班咩人嚟架？點解無啦啦追住你嘅？」

「你咁仲要問，佢地好明顯係嚟捉你架啦！」

「但佢地係追住你，唔係追住我喎。」

「家下我戴住個頭套，班人以為我係你，所以咪嚟捉我囉！」





「下？唔係呀嘛？」

「仲『下』？快啲跑啦！」

我同36號由街跑到入一個商場，再從個商場跑返出街。

後面嗰班人全程一路追住我地，而且仲call支援嚟幫手。

本來佢地幾丁友，搞搞下越變越多人，家陣差唔多有成十幾個人同一時間追住我地。





佢地前後包抄，我同36號就無路可走，被趕入一條掘頭路。

一面石屎墻擋住我地嘅去路，同時馬會嗰班人就嚟殺到埋身。

前無去路，後有追兵。

唔通我地就咁束手就擒？

「做咩突然停落嚟？繼續行啦！」36號同我講。





「咁大副墻擋住，點行呀？你估我識飛咩？」

「用個頭撞咪得囉！」

「用個頭撞？」

呢個時候，我諗起幾日前36號唔小心撞到燈柱，結果個頭撼到條燈柱斷開咗。

燈柱都撞得爛，話唔定可以撞爛幅墻。

於是我擰轉面，用個頭向前一撼。

「砰！」

一瞬間，成棟墻好似骨牌咁冧咗落嚟。





我嚇咗一跳，估唔到頭套嘅威力咁大！

有咗呢個「鐵頭功」，之後再遇到咩障礙物，我就一嘢用個頭撼爆佢。

路牌、圍欄、燈柱，凡係阻住我嘅，統統俾我撼爆！

而後面嗰班人依然窮追不捨。

為咗徹底擺脫佢地，我將佢地引到去一個公園小徑，跟住一口氣連續撼斷三棵大樹。

三棵大樹「啪」一聲斷開，並攔腰倒下，擋住佢地嘅去路。

今次輪到佢地班人無路可走，只能眼白白睇住我呢粒「36」號波越走越遠。





經過一輪追逐，我地兩個總算成功脫險。

傍晚時分，太陽差唔多要落山。

我地抖順條氣，經過九龍城碼頭，打算搭船由九龍返去北角。

未行到碼頭，離遠見到有班人揸住架撐好似想開拖咁。

再行近啲睇下，發現有十幾二十個紋身佬，凶神惡煞咁圍住一個男人。

咦喂！嗰個被人圍嘅男人，佢上半身光脫脫，下半身淨係著住一條紅色嘅底褲，頭上戴住一個印有「24」嘅紅色頭套。

莫非呢個男人就係24號攪珠波？