我和六合彩發生了一段不可告人的（性）關係: 【15】

穿過對面馬路，我同36號行入七仔。

但入到去，搵勻曬成間舖頭，包括所有貨架、收銀櫃仲有角落頭，都唔見到嗰粒波嘅蹤影。

七仔嘅職員見我地搞搞震無幫襯，一怒之下將我地攀咗出去。

奇怪啦？明明啲訊號咁接近，點解搵極都搵唔到個波嘅？

就喺我疑惑之際，眼尾睄到便利店門口擺放住一部扭蛋機。





「有無人啊！放我出去啊！」

唔通…個波喺入邊？

我哄埋去部機度睇真啲，隱約見到有一個同其他扭蛋唔同嘅綠色波。

我拿拿臨拎個銀包出嚟，入幾個銀仔落去，試下扭個波出嚟。

一次唔得，再扭一次。





當入面啲扭蛋越嚟越少，嗰粒六合彩波就越顯眼。

我繼續入錢，希望快啲將個波扭出嚟。

36號見好似好好玩，就話要扭埋一份。

最後我差唔多入咗成千銀落去，幾乎將成部機嘅扭蛋都扭曬出嚟，先至扭到嗰粒攪珠波。

6號，綠色波，Get！





唔知係咪搵開有條路，之後我喺兩個鐘之內，先後喺樹上嘅鳥巢以及沙灘上，分別搵到4號同22號波。

我將三粒波好小心咁放喺背囊裡面。

望一望時間，依家係下晝五點正。

喺日落之前，我想繼續再搵多陣。

離開沙灘，我地就搭車返出市區。

落車嗰陣，突然颳起一陣大風，將我包住頭套嘅毛巾吹走。

街上嘅途人經過，都用奇怪嘅眼神望住我個頭。

個頭套又大又重，又真係幾引人注目嘅。





過咗一陣，突然有架貨van急停剎掣，停喺路邊。

隨即有四、五個著住馬會制服嘅人，從車上面行落嚟。

佢地手持住麻繩同埋捕魚網，快步向住我衝埋嚟。

我feel到有啲唔同路，於是唔理咁多，拿拿聲調頭走。

「喂36號！你唔好走啊！」嗰班人向住我大喝一聲。

36號唔知頭唔知路，以為嗌緊佢，點知嗰班人無理佢，淨係追住我。

如果我估錯嘅話，呢班人應該係馬會特派，專門嚟回收唔見咗嘅攪珠波。





而佢地好明顯就係認波唔認人。

見我戴住個六合彩頭套，佢地就以為我係36號波。

如果俾佢地捉走咗，咁我咪要成世做波？

事關重大，我立即加快腳步，用盡全力向前跑。