我和六合彩發生了一段不可告人的（性）關係: 【14】

出發前，我用毛巾包住個頭，遮起個頭套。

開頭我係諗住自己一個出去搵，不過後尾諗諗下都係多個幫手好啲，於是就帶埋36號。

至於45號就醉到啤啤夫，連企起身都企唔到，一味喺度口噏噏，話啲酒飲曬，問我仲有無。

估唔到唔使一日時間，呢條友竟然變成一個酒鬼。

而望見佢肥胖嘅身形同pea曬嘅樣，不禁令我諗到一個問題。





既然真正嘅攪珠係一場埋身肉搏嘅戰鬥，咁49個波，當中一定有強有弱。

即係我地平時所講嘅「熱門號碼」同「冷門號碼」。

如果要收集攪珠波，咁一定係收集啲最勁嘅號碼就最好。

咁邊啲冧巴先叫勁呢？

我一邊行，一邊上六合彩嘅官方網站，check下每個攪珠波嘅數據。





根據官網顯示，唔計特別號碼，45號對上一次攪出為中獎號碼，已經要數到第57期，依家最新嗰期開到第82期。

即係話，佢已經連續25期無贏過。

再仔細翻查下，原來今年82期入面，45號淨係贏過四次。

照咁睇嚟，佢嘅實力似乎有啲弱。

相反，36號今年有十五次成為過中獎號碼，實力屬於中等。





如果總括咁多年嚟嘅數據，整體嚟計，贏得最多嘅係30號。

佢以486勝排名第一，單係今年就已經贏過十九次，暫時係中獎號碼嘅NO.1。

如果可以將佢收歸旗下，咁就正啦！

然而，現實總係同幻想有落差。

我同36號喺街逛咗成個上晝，一粒波都搵唔到，更唔好講話30號波。

36號問我：「話時話，點解你無啦啦咁積極去搵其他攪珠波？」

「因為我想組織一隊六合彩攪珠戰隊。」

「咩嚟架？」





「我打算集齊曬所有失散嘅六合彩波，並撮合佢地成為一個團隊，等到下一期攪珠嗰陣，我要佢地合作幫我贏個頭獎返嚟！」

「哦~原來係咁~」

「拿，呢壇嘢我已經預埋你架啦，早兩日我帶你又去海洋公園，又去迪士尼，你玩得咁開心，到時唔該你幫幫手出盡全力，同我贏個頭六名返嚟。」

「唉~呢啲嘢等我變返個攪珠波再講啦。」36號無奈咁嘆咗一口氣。

搵左成朝，我地都行到有啲攰，正想話搵個地方抖下嘅時候，突然間我嘅頭套接收到一把聲音。

「放我出去啊！」

訊號好強烈，嗰個波應該就喺附近。





環顧四周，我睇見對面街有間七仔。

「放我出去啊！」

無估錯嘅話，啲訊號應該就係喺嗰間便利店傳過嚟。