我和六合彩發生了一段不可告人的（性）關係: 【11】

我將粒波放入褲袋，返到屋企再攞返出嚟。

36號同我講，攪珠波除咗有變身次數嘅限制之外，喺受驚嘅時候亦都無辦法變身。

照咁睇嚟，45號應該係受驚過度，入到屋一直都無變身。

我地一路等，等到差唔多半個鐘佢先驚完，卒之肯現出真身。

36號嘅外形係一個廿幾歲嘅大波妹，相反，45號就係一個三十幾歲嘅中佬。





佢全身赤裸，身形有啲肥胖。

變完身之後，45號望一望36號，再望一望我。

「頭先…係你救咗我？」

45號啱先叫救命叫得咁大聲，家陣講嘢居然咁陰聲細氣。

我點一點頭答佢：「係呀。」





「多謝你，好彩有你喳，如果唔係，我隨時俾嗰隻『汪汪』咬死。」

「唔使客氣。」

「咁請問，呢度係邊度嚟架？」45號細細聲問。

「呢度係我屋企。」

「噢~你地人類住嘅地方原來咁細架。」





「……」

我靜咗無出聲，唔知點應佢。

45號亦無繼續講落去，氣氛一下子變得有啲安靜同尷尬。

為咗打破沉默嘅氣氛，我打開雪櫃，拎罐啤酒出嚟俾45號：「不如飲罐啤酒定下驚？」

「好呀，多謝」45號打開罐啤酒，飲咗一啖。

下一秒，佢塊面變得好似馬騮屎忽咁紅。

跟住佢再飲一啖，大嗌咗一句：「嘩！好好飲呀！」

嗌完呢句嘢，佢成個人就摞低咗。





開頭仲以為攪珠波對酒精敏感，所以搞到佢暈咗。

後尾發現原來佢只係飲醉咗。

之後我同36號夾手夾腳抬佢上床。

睇一睇個鐘，依家嘅時間已經係凌晨一點幾。

喺迪士尼玩咗成日，返到嚟同36號搞完嘢，佢個頭套無啦啦轉移到我頭上，仲未搞清楚發生咩事就聽到求救聲，再喺隻狗口中救出45號波。

一日之內經歷咗咁多嘢，我已身心俱疲。

下格床俾45號訓咗，上格床就讓俾36號，而我自己就訓地下。





有個頭套挨住，唔使用枕頭，一瞇埋眼我就訓著咗。

到第二日訓醒，擘大眼，我見到45號成身酒氣咁趴喺我身上，地下仲周圍都係空嘅啤酒罐。

呢條肥仔肯定係琴晚偷偷地打開雪櫃偷酒飲。

我用力慢慢咁移開佢個人。

起返身，我見到36號眼光光咁坐喺摺檯上面。