我和六合彩發生了一段不可告人的（性）關係: 【10】

「救命！有無人救我！」

「36號…我…我喺頭套入面聽到啲聲…有…有人嗌救命…」

「咁有可能係其他攪珠波傳出嘅電波訊號。」

36號解釋：「我地攪珠波之間可以互相感應，只要距離夠近，或者訊號夠強，咁就會感應到。」

竟然係咁？！





半個鐘之前，我仲諗緊點樣收集失散嘅攪珠波，假如家下有咗頭套嘅感應力，咁我就能夠將佢地逐個搵出嚟。

到時搵齊曬啲波，組到一隊攪珠戰隊，咁再諗辦法整甩個頭套都未遲。

「你話距離夠近就可以感應到其他波，即係話嗰粒求救嘅攪珠波，好有可能就喺附近？」我問36號。

「無錯，話唔定佢就喺樓下或者對面街。」

「咁你快啲著返衫，跟我嚟！」我拉返好條褲鏈，並用頭巾遮住頭上嘅頭套。





「去邊呀？」

「仲使講，梗係去救人啦！」

落到街，我順住啲求救聲，同36號一齊去搵嗰個波。

依家差唔多十二點，條街無乜人。

行過對面街，經過兩個街口，我地轉入一條橫巷，發現有一隻流浪狗擔住一粒紅色嘅波。





「救命啊！」

我感應到啲聲就係隻狗口中嗰粒波傳過嚟。

為免打草驚蛇，嚇走隻狗，我選擇一步一步咁慢慢接近佢。

但隻唐狗似乎察覺我嘅動機，居然想調頭走。

我馬上大步踏前，伸手搶佢口中嘅攪珠波。

而隻狗咬到個波好實，死都唔肯鬆口。

「好痛啊！」

嗰紅色波發出痛苦嘅叫聲。





「36號，你唔好掛住望，快過嚟幫拖啦！」

「隻『汪汪』睇落有啲得人驚喎。」36號騰曬雞，唔敢行過嚟。

照咁睇嚟，同隻狗硬碰硬無乜著數。我決定用下計仔。

我一隻手去搶個波，另一隻手伸入褲袋，將入面一塊紙巾捏成一個波，然後拎出嚟喺隻狗面前樣嚟樣去，並且大聲數一二三。

數到第三下，我就用力彈個紙球出去。

下一秒，隻狗真係鬆開口，擰轉面去追嗰舊紙巾。

就係咁，我成功喺隻狗嘅口中救返個波。





拎上手一睇，係一粒紅色45號波。