我和六合彩發生了一段不可告人的（性）關係: 【5】

一落到街，36號就好似嗰啲小學生去旅行咁，興奮到傻咗。

行過見到乜嘢覺得好玩就埋去摸，識郁嘅又掂，唔識郁嘅又掂，爭啲連差佬支警槍都攞埋。

除此之外，我地每行前十米，佢就問我「到未到未」，煩到我真係好想一巴車埋去叫佢收聲。

咁都未算，佢行路完全唔帶眼，鍾意周圍望，結果行行下，佢個頭「嘭唥」一聲，一嘢撼落條燈柱度。

佢個頭就無事，但條燈柱就成條斷開，冧咗落嚟。





好在冧落嚟嗰下無砸到人。

趁無乜人見到，我拿拿臨掹佢走，否則俾差佬捉到就大撚獲。

帶住呢條友出咗街一陣，我就已經覺得佢好麻煩。

但為咗六合彩嘅秘密，我唯有暫時忍耐。

大約半個鐘後，我地就嚟到海洋公園。





香港大型嘅遊樂園主要有兩個，一個係海洋公園，一個係迪士尼樂園。

至於帶佢嚟海洋公園嘅原因，主要係因為近我屋企，同埋門票平過迪士尼。

啱先未出發都已經咁興奮，入到場36號直頭變咗隻「甩繩馬騮」，周圍玩周圍貢，叫都叫唔住。

而我個腦就淨係喺度諗，究竟六合彩有啲咩秘密？

喺我諗呢個問題嘅時候，36號就揸住張地圖，逐個機動遊戲玩勻曬。





本身我就好怕玩呢啲機動遊戲，只但係條友係都要拉埋我陪佢玩，仲要玩一次唔夠玩兩次，嚇到我腳都軟埋。

玩完曬所有機動遊戲，36號就轉戰攤位遊戲。

掟波波、掟公仔、射籃球…每個攤位輪住玩，又係玩完一次又一次，贏完獎品都唔肯走。

同機動遊戲唔同，攤位遊戲係需要額外收錢，佢咁樣喪玩法，我荷包頂唔順。

眼見帶嚟嘅現金差唔多使曬，無辦法之下，我唯有夾硬拉佢走。

「有無搞錯呀！我都未玩夠！」

「夠架啦，玩咗成日咁攰，我地都係走啦！」

「你夠我未夠喎！」





「總之我應承你嘅嘢已經做咗，咁你係咪都應該兌現承諾，講出六合彩嘅秘密。」

「我講俾你聽都得，但我要掟多個公仔返嚟。」

「OKOK。」我好唔情願咁答應佢。

「其實六合彩攪珠機…」

本來36號已經準備開口講，但突然間有個阿媽拖住個細路仔，喺我地身邊行過。

阿媽問個仔：「仔仔，你覺得海洋公園定係迪士尼公園好玩啲呀？」

個細路仔答：「迪士尼公園！」





呢段說話俾36號聽到曬。

佢第一時間就問我迪士尼公園喺邊，跟住又係咁叫我帶佢去，仲話要去埋迪士尼先肯講個秘密俾我聽。

我喺心入面屌咗一聲，到咗第二日，我又逼不得已帶咗佢去迪士尼樂園。

唔計買門票，淨係飲飲食食、吃喝玩樂，呢兩日加埋起碼使咗我三千幾銀，我仲要陪埋佢玩，簡直就係又出錢又出力。

再加上我連續攞咗兩日大假，搞到我老頂詐曬型，係咁WhatsApp轟炸我，煩到嘔電。

家下我淨係希望36號呢粒攪珠波唔好撚化我，最好真係講到啲有用嘅資訊，等我可以中返次六合彩。