我和六合彩發生了一段不可告人的（性）關係: 【4】

身為一條死窮撚，我最大嘅夢想就係中六合彩頭獎。

假如帶佢去玩就可以知道六合彩嘅秘密，咁呢個交易絕對制得過。

於是，我諗都唔諗，一口就答應咗。

「事不宜遲！咁我地出發啦！」

36號從摺檯上一嘢跳返落地下，並轉身向住門口行去。





我拿拿臨上前拉住佢：「唔係呀嘛，你就咁唔著衫就行出街？」

「有咩問題，我地不嬲都唔著衫架啦。」

「梗係唔得啦，你一係你變返粒波，一係就笠返件衫。」

「我地變身係有限制架，啱先我連續變咗兩次身，所以短時間內都無辦法再變。」

「咁你都係快啲笠返件衫啦。」





我打開衣櫃，搵咗件白色恤衫同牛仔褲俾佢著。

除此之外，佢頭上嘅36號藍色頭套亦都非常顯眼。

以免招人耳目，我再搵多塊布包住佢個頭。

咁樣出到街，啲人最多以為佢係穆斯林女人，唔會認得出佢係六合彩波。

出發前，我先打電話同老細請假。





搞掂之後，我地就正式出發。

行出門口，咁啱我地就撞到對面屋個死𡃁仔同佢老豆。

「阿爸，就係佢搶走我個彈彈波呀！」原來個細路特登帶佢老豆嚟搵我算賬。

「彈彈波？你搵我…」

36號無啦啦搭嗲，我立即掩住佢把口，費事佢亂講嘢。

至於個細路嘅老豆就好客氣咁問我：「你好呀，我地係住對面架，『ching』問你係咪攞走我個仔個波？」

但我唔可以講真話，所以就答：「無呀，我都無攞過。」

「你講大話！明明係你搶走我個波。」





「唔信嘅咪入嚟搵下囉！」我讓條路出嚟俾佢地入屋搵。

個細路一支箭咁衝入嚟，趟開曬啲櫃桶，又捐落床下底度搵，結果當然係乜都搵唔到。

因為佢唔知嗰粒彈彈波已經變咗一個人，依家仲企咗喺我隔籬。

個細路搵嚟都搵唔到，最後死死地氣返出嚟。

佢好唔忿氣咁向我舉一下中指，跟住就跟佢老豆返入屋。

而我同36號亦都終於可以出發。